डोंबिवली : पश्चिम डोंबिवलीतील सुभाष रोडला असलेल्या चिंचोड्याचा पाड्यात सोमवारी (दि.4) दुपारच्या सुमारास ४२ वर्षीय इसम हातात सुरू घेऊन परिसरातील रहिवाशांना शिवीगाळ करत धमकावत होता. ही माहिती कळताच विष्णूनगर पोलिस ठाण्याच्या गस्तीवरील पोलिसांनी तातडीने घटनास्थळी धाव घेऊन सदर इसमाला ताब्यात घेतले.
अमित लक्ष्मण वझे (४२) असे पोलिसांनी ताब्यात घेतलेल्या इसमाचे नाव असून तो चिंचोड्याचा पाड्यात राहणारा आहे. अमित वझे याच्या ताब्यातून पोलिसांनी १४ इंच लांबीचा सुरा ताब्यात घेतला आहे. शस्त्र अधिनियम कायद्याने अमित वझे याच्याविरोधात हवालदार शकील जमादार यांच्या तक्रारीवरून पोलिसांनी गुन्हा दाखल केला आहे. या संदर्भात पोलिस सूत्रांकडून मिळालेल्या माहितीनुसार, सोमवारी (दि.4) दुपारी पोलिसांना माहिती मिळाली की, डोंबिवली पश्चिमेतील सुभाष रोडला वझे खाणावळी जवळ असलेल्या हैंदऱ्या संकुल भागात एक इसम हातात सुरा घेऊन लोकांंना शिवीगाळ करत धमकावत आहे. वरिष्ठ पोलिस निरीक्षक संजय पवार यांनी तातडीने ही माहिती गस्तीवरील हवालदार शकील जमादार यांना दिली. त्यानुसार सहाय्यक पोलिस निरीक्षक प्रशांत मोरे, हवा. जमादार, भोसले, मोरे यांनी तातडीने घटनास्थळी जाऊन अमित वझे याला शांत करून शिताफिने त्याच्या ताब्यातील सुरा काढून घेतला. १४ इंच लांबीच्या या सुऱ्याला ९.५ इंच लांबीचे पाते आहे. हवालदार जमादार यांनी पंचांच्या समक्ष घटनेचा पंचनामा करून सुरा जप्त केला. या प्रकरणी पोलिस अधिक तपास करत आहेत.
