डोंबिवली : आपली मुलगी अद्याप लग्नाची नाही. केवळ सतरा वर्षाची आहे, हे माहिती असुनही कल्याणमधील एका दाम्पत्याचे मुलीचा विवाह पुणे शहरालगतच्या विस्तारित परिसरात राहत असलेल्या एका 25 वर्षाच्या तरूणाबरोबर लावला. लग्नानंतर अल्पवयीन मुलगी गर्भवती राहिली. त्यानंतर बालविवाहाचा हा सारा प्रकार उघडकीस आल्यानंतर कल्याणच्या बाजारपेठ पोलिसांना मिळालेल्या माहितीप्रमाणे पोलिसांनी अल्पवयीन मुलीच्या माता-पित्यासह तिचा पती आणि सासू-सासऱ्यांच्या विरोधात बाल विवाह प्रतिबंधक कायद्याने गुन्हा दाखल करण्यात आला आहे.
जानेवारी 2024 ते 4 फेब्रुवारी 2025 या कालावधीत हा प्रकार घडला आहे. मागील वर्षी जानेवारी महिन्यात पीडित मुलीच्या घरी तिच्या आई, वडिलांनी लपुनछपून हा बालविवाह पुणे येथील एका तरूणाबरोबर लावून दिला. बाजारपेठ पोलिस ठाण्याचे पोलिस उपनिरीक्षक ज्ञानेश्वर गोरे यांनी सरकारतर्फे दिलेल्या फिर्यादीनुसार कल्याणमधील एका परिसरात 35 ते 38 वयोगट असलेले दाम्पत्य राहते. त्यांना सतरा वर्षाची मुलगी होती. आपली मुलगी अल्पवयीन आहे हे माहिती असुनही त्यांनी तिचे लग्न पुणे परिसरातील एका 25 वर्षाच्या तरूणाबरोबर ठरवले.
तरूणाच्या आई-वडिलांनी या विवाहाला संमती दिली. दोन्ही कुटुंबीयांची लग्नाला संमती झाल्यावर मागच्या वर्षी जानेवारी महिन्यात पीडित मुलीच्या घरी तिचा विवाह पुण्यातील तरूणाबरोबर लावून देण्यात आला. लग्नानंंतर पीडित मुलगी गर्भवती राहिली. हा सगळा बालविवाहाचा प्रकार उघडकीस आल्यानंतर पोलिसांनी या साऱ्या प्रकरणाची चौकशी केली. त्यावेळी सतरा वर्षाच्या मुलीचा विवाह 25 वर्षाच्या तरूणाशी आई-वडिलांनी लावून दिला. हा प्रकार बाल अत्याचाराचा असल्याचे तपासात निष्पन्न झाले. या सगळ्या प्रकाराला पीडित मुलीचे आई-वडील, मुलीचे सासू-सासरे आणि पती हे सर्व जबाबदार असल्याने पोलिसांनी बालविवाह प्रतिबंधक कायद्याने पाच जणांवर गुन्हा दाखल केला आहे. पोलिस निरीक्षक लक्ष्मण साबळे यांच्या मार्गदर्शनाखाली सहाय्यक पोलिस निरीक्षक सुधर्म सावंत या प्रकरणाचा तपास करत आहेत.
दोन वर्षापूर्वी कल्याणमधील एका भागात अल्पवयीन मुलीचा विवाह लावून देण्यात येत असल्याचा प्रकार काही सामाजिक संस्थांनी उघडकीला आणला होता. याही प्रकरणी पोलिस ठाण्यात गुन्हा दाखल करण्यात आला होता. कल्याणमधील एका विशिष्ट भागात बालविवाहाचे असे प्रकार लपूनछपून होत असल्याच्या काही सामाजिक संस्थांच्या तक्रारी आहेत.
