जळगाव : चाळीसगाव शहरात बुधवार (दि.8) मध्यरात्री गोळीबार करून दहशत निर्माण केल्याचा प्रकार घडला आहे. शहरातील पोद्दार इंटरनॅशनल स्कूल जवळ अज्ञात व्यक्तींनी हवेत गोळीबार केला. त्याचवेळी दगडफेक देखील करण्यात आली, ज्यामुळे संपूर्ण परिसरात दहशतीचे वातावरण निर्माण झाले आहे. या घटनेबाबत चाळीसगाव शहर पोलीस ठाण्यात वेगवेगळे दोन गुन्हे दाखल करण्यात आले आहेत.
पोलिसांच्या प्राथमिक माहितीनुसार, सारंग अशोक बेलदार (वय ४९ रा. पोतदार हायस्कूल चाळीसगाव) याच्या घरासमोर मंगळवारी (दि.७) रोजी ११.४५ वाजेच्या सुमारास तीन दुचाकींवर सहा जण आले. सर्वांनी तोंडाला रूमाल बांधलेला होता. बुलेट मोटारसायकलवर मागे बसलेल्या एकाने हवेत गोळीबार केला. तर सारंग बेलदार याच्या घराच्या पाेर्चमध्ये उभ्या असलेल्या दुचाकीवर दगड टाकून नुकसान केले तर पाेर्च बाहेर काचेची बाटली फोडून शिवीगाळ करत दुचाकीवरून पसार झाले. हा गोळीबार जुन्या वादातून करण्यात आल्याचे सांगितले जात आहे. गोळीबार करताच आरोपी घटनास्थळावरून फरार झाले आहे. गोळीबार करून संशयित आरोपी हे फरार होताना सीसीटीव्ही कॅमेऱ्यामध्ये कैद झाले आहेत.
घटनेची माहिती मिळाल्यानंतर चाळीसगाव शहर पोलीस ठाण्याचे पोलीस कर्मचारी व अधिकारी यांनी घटनास्थळी धाव घेतली. तर दुसरीकडे पोलीसांनी संशयित आलेल्या संकेत उर्फ बाळू मोरे (रा. हनुमान वाडी, चाळीसगाव) याच्या घराची झाडाझडती घेतली असता त्याच्या घरातून सहा जिवंत काडतूस, पिस्टल मॅगझीन, कोयता, गुप्ती, स्टील रॉड आणि बेसबॉल खेळण्याची लाकडी बॅट असा घातक हत्यारे मिळून आले आहे. या संदर्भात चाळीसगाव शहर पोलीस ठाण्यामध्ये वेगवेगळे दोन गुन्हे दाखल करण्यात आले आहे. चाळीसगाव शहरातील या घटनेनंतर नागरिकांमध्ये भीतीचे वातावरण निर्माण झाले आहे. पुढील तपास पोलीस निरीक्षक किरणकुमार कबाडी हे करीत आहेत.
