जळगाव : यावल पोलीस ठाण्याच्या हद्दीत खुनाच्या प्रयत्नाच्या गुन्ह्यात फरार असलेल्या एका आरोपीला जळगावातील आंबेडकर मार्केट परिसरातून अटक करण्यात आली आहे. स्थानिक गुन्हे शाखेच्या पथकाने ही कारवाई करत त्याच्याकडून देशी बनावटीचे गावठी पिस्तूल आणि पाच जिवंत काडतूस असा मुद्देमाल जप्त केला आहे.
अटक करण्यात आलेल्या आरोपीचे नाव अक्षय अजय जयस्वाल (वय २४, रा. शिवाजी नगर, जळगाव) असे आहे. त्याच्यावर यावल पोलीस ठाण्यात खुनाच्या प्रयत्नाचा गुन्हा दाखल होता.
या गुन्ह्यातील एका अटकेत असलेल्या आरोपीची सखोल चौकशी करत असताना, त्याने अक्षय जयस्वाल याला देशी बनावटीचे पिस्तूल विकल्याची माहिती पोलीसांना दिली. त्यानुसार स्थानीय गुन्हे शाखेचे वरिष्ठ पोलीस निरीक्षक संदीप पाटील यांच्या मार्गदर्शनाखाली पोलीस उपनिरीक्षक शरद बागल यांच्या नेतृत्वात पथकाने मंगळवार (दि. 5 ऑगस्ट) रोजी दुपारी ३ वाजता आंबेडकर मार्केट परिसरात कारवाई करत अक्षय जयस्वाल याला दुचाकीवर फिरताना अटक केली. त्याची चौकशी केली असता त्याने दुचाकीच्या सीटखाली पिस्तूल व पाच जिवंत काडतूस लपवून ठेवले असल्याची त्याने कबुली दिली.
पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि पोलीस उपअधीक्षक संदीप गावीत यांच्या मार्गदर्शनाखाली वरिष्ठ पोलीस निरीक्षक संदीप पाटील, पोलीस उपनिरीक्षक शरद बागल यांच्यासह अकरम शेख, मुरलीधर धनगर, प्रवीण भालेराव, नितीन बाविस्कर, किशोर सोनवणे, सिद्धेश्वर हापकर, रवींद्र कापडणे व गोपाल पाटील यांनी ही कारवाई पार पाडली
