जळगाव : जळगाव जिल्ह्यात १६ सप्टेंबर ते ३० सप्टेंबर या कालावधीत जिल्हा पोलिसांनी अवैध शस्त्रविरुद्ध विशेष मोहीम राबवली. या मोहिमेमध्ये सात ठिकाणी छापे टाकून १० देशी बनावटीची पिस्तुलं व २४ जिवंत काडतूस जप्त करण्यात आले. याप्रकरणी १२ आरोपींविरुद्ध आर्म्स ॲक्ट अंतर्गत गुन्हे दाखल करण्यात आले आहेत.
ही मोहीम जिल्ह्यातील गंभीर गुन्हेगारी व उत्सव काळात संभाव्य अनुचित घटनांना प्रतिबंध करण्याच्या उद्देशाने राबवण्यात आली. जिल्हा पोलीस अधीक्षक डॉ. मुळेश्वर रेड्डी, अपर पोलीस अधीक्षक अशोक नखाते, कविता नेरकर (चाळीसगाव), तसेच सर्व उपविभागीय पोलीस अधिकारी यांच्या मार्गदर्शनाखाली स्थानिक गुन्हे शाखा व पोलीस ठाण्यांनी संयुक्तरित्या कारवाई केली.
या ठिकाणी करण्यात आली जप्तीची कारवाई
पाचोरा : समाधान बळीराम निकम याच्याकडून २ गावठी पिस्तुलं व १ काडतूस (त्याच्यावर यापूर्वी ८ गुन्हे दाखल आहेत)
अमळनेर: अनिल चंडालेकडून २ पिस्तुलं व ४ काडतूस.
यावल: युवराज उर्फ युवा भास्कर याच्याकडून १ पिस्तुलं व २ काडतूस (त्याच्यावर १ गुन्हा दाखल आहे).
भुसावळ बाजारपेठ: अमर कासोटे याच्याकडून १ पिस्तुलं व २ काडतूस (त्याच्यावर १ गुन्हा दाखल आहे).
वरणगाव: काविन भोसले याच्याकडून १ पिस्तुलं व १ काडतूस जप्त करण्यात आले
एमआयडीसी, जळगाव: विठ्ठल घोडे याच्याकडून १ पिस्तुलं व ४ काडतूस (त्याच्यावर ३ गुन्हे दाखल आहेत).
जळगाव शहर: युनूस उर्फ सद्दाम पटेल व इतर ३ जणांकडून २ पिस्तुलं व १० काडतूस (पटेलवर २ गुन्हे दाखल आहेत).
