जळगाव : शहरातील एमआयडीसी ई सेक्टरमधील ‘आनंद बॅटरी’ कंपनीत झालेल्या घरफोडीचा छडा एमआयडीसी पोलिसांनी अवघ्या काही तासांत लावल्याने पोलीसांच्या कामगिरीचे कौतुक केले जात आहे. पोलिसांनी दोन अट्टल चोरट्यांना जेरबंद करून ९ लाख ७० हजार रुपये किमतीच्या शिशाच्या प्लेट्स आणि गुन्ह्यात वापरलेली रिक्षा जप्त केली.
३१ जुलै २०२५ रोजी रात्री ८.३० ते १ ऑगस्ट २०२५ रोजी सकाळी ८ वाजेच्या दरम्यान, कंपनीतून बॅटरी निर्मितीसाठी वापरल्या जाणाऱ्या ३२५ किलो वजनाच्या, ९७ हजार रुपये किमतीच्या शिशाच्या प्लेट्स चोरीस गेल्या होत्या. याप्रकरणी अज्ञात चोरट्यांविरुद्ध एमआयडीसी पोलीस ठाण्यात गुन्हा दाखल करण्यात आला.
पोलीस निरीक्षक बबन आव्हाड यांच्या मार्गदर्शनाखाली गुन्हे शोध पथकाने सीसीटीव्ही फूटेज व गुप्त माहितीच्या आधारे संशयितांचा शोध घेतला. तपासात जळगावातील अट्टल गुन्हेगार मोहसिन उर्फ शेमड्या सिकंदर शहा व त्याचे साथीदार चोरीत सामील असल्याचे उघड झाले. तात्काळ कारवाईत मोहसिन शहा याला ताब्यात घेऊन चौकशी करण्यात आली असता त्याने गुन्ह्याची कबुली दिली. त्याच्या साथीदार इम्रान सैय्यद हरुण (रा. नशिराबाद), रहीम उर्फ बाबल्या रशिद खान आणि मेहमुद उर्फ चिनी शेख मोहंमद यांचाही यात सहभाग असल्याचे त्याने सांगितले आहे.
त्यानंतर पोलिसांनी नशिराबाद परिसरातून इम्रान सैय्यद हरुण यालाही अटक केली. त्यांच्या ताब्यातून चोरीस गेलेल्या ३२७ किलो वजनाच्या १५ शिशा प्लेट्स आणि २ लाख रुपये किमतीची तीनचाकी रिक्षा हस्तगत करण्यात आली. अटक केलेल्या दोघांना न्यायालयाने पोलीस कोठडी सुनावली आहे. उर्वरित आरोपींचा शोध सुरू असून प्रमोद लाडवंजारी हे पुढील तपास करीत आहेत.
