जळगाव : शहरातील गोविंदा रिक्षा स्टॉप येथील अल्ट्रान क्रेटो फायनान्स कंपनीवर गृहकर्ज वसुलीप्रकरणी मोठा घोटाळा झाल्याचे उघडकीस आले आहे. थकलेले हप्ते चुकते करूनही फायनान्स कंपनीच्या कर्मचाऱ्यांनी सदर रक्कम कर्जधारकाच्या खात्यात न भरता दुसऱ्या ठिकाणी वळवल्याने एका शेतमजुराचे घर बँकेने सील केले आहे. या प्रकरणी शहर पोलीस ठाण्यात तीन कर्मचाऱ्यांविरुद्ध गुन्हा दाखल करण्यात आला आहे.
पळसखेडा बुद्रुक (ता. जामनेर) येथील शेतमजूर विजय रामू चिंचोले (वय 26) यांनी घर खरेदीसाठी अल्ट्रान क्रेटो फायनान्स कंपनीकडून गृहकर्ज घेतले होते. मात्र, विविध कारणांमुळे त्यांचे सात हप्ते थकीत राहीले. या हप्त्यांची एकूण रक्कम 52,000 रुपये असून, त्यांनी ती वसुली अधिकारी चंद्रकांत कोळी यांच्याकडे भरली.
मिळालेल्या माहितीनुसार, वसुली अधिकारी चंद्रकांत कोळी यांनी वरिष्ठ अधिकारी विजय आचलकर आणि आदिती तळवलकर यांच्या सांगण्यावरून सदर रक्कम चिंचोले यांच्या खात्यात न भरता एनपीए (थकीत कर्ज) खात्यात वर्ग केली व ते खाते बंद केले. परिणामी, चिंचोले यांचे हप्ते भरले न गेल्याचे दाखवून फायनान्स कंपनीने त्यांच्या घरावर जप्तीची कारवाई केली.
फायनान्स कंपनीच्या या प्रकारामुळे आर्थिक फसवणूक झाल्याने विजय चिंचोले यांनी शहर पोलीस ठाण्यात फिर्याद दाखल केली आहे. त्यानुसार, चंद्रकांत कोळी, विजय आचलकर आणि आदिती तळवलकर यांच्या विरोधात फसवणुकीचा गुन्हा दाखल करण्यात आला आहे. पुढील तपास हेड कॉन्स्टेबल गोरख पाटील करीत आहेत.
