नांदगाव ( नाशिक ) : परधाडी घाट ( ता.नांदगाव ) परिसरात शुक्रवार (दि.12) रोजी रात्री एक धक्कादायक प्रकार घडला. पत्नीला मित्राला भेटावयाचे असे सांगून घाटात नेऊन पत्नीच्या गळ्यावर चाकूने जीवघेणा हल्ला केल्याची घटना उघडकीस आली आहे. या घटनेत पीडित पत्नी गंभीर जखमी झाली असून, तिच्यावर मालेगाव सामान्य रुग्णालयात उपचार सुरू आहेत.
या प्रकरणी पीडित पत्नीने पतीविरूद्ध नांदगाव पोलिस ठाण्यात खुनाचा प्रयत्न केल्याचा गुन्ह्याची नोंद दाखल केली आहे. हल्ला करून फरार झालेल्या पतीस नांदगाव पोलिसांनी शिताफीने तपास करत येवला येथून ताब्यात घेतले आहे. पोलिसांनी दिलेल्या माहितीनुसार राणी गोविंद माळी (वय - 20 रा.कोटमगाव विठ्ठलाचे, ता. येवला, जि. नाशिक) नामक पत्नीला घेऊन पती गोविंद माळी हा गुरुवारी ( दि.11 ) सायंकाळच्या दरम्यान मित्राला भेटायला जायचे आहे असे सांगत परधाडी घाट या परिसरात घेऊन गेला. घाटातील निर्जन स्थळी पोहचताच त्याने सायंकाळी सात वाजेच्या सुमारास दुचाकी थांबवून अचानक चाकू काढून पत्नीच्या गळ्यावर, पोटावर, पाठीवर आणि कमरेवर सपासप वार केले.
या हल्ल्यात गंभीर जखमी झालेल्या पत्नीला निर्जन स्थळी टाकून आरोपी पती गोविंद माळी हा मोटारसायकलवर पसार झाला. दरम्यान, शुक्रवार ( दि.१२ ) सकाळच्या सुमारास परधडी गावातील काही नागरिकांना पीडिता रक्ताने माखलेल्या अवस्थेत दिसून आली. ग्रामस्थांनी तत्काळ एका वाहनातून तिला ग्रामीण रुग्णालय, नांदगाव येथे उपचारासाठी दाखल केले. रुग्णालयात शुद्धीवर आल्यानंतर पीडितेने पोलिसांसमोर घडलेल्या घटनेची धक्कादायक माहिती दिली. तिच्या जबाबावरून नांदगाव पोलीस ठाण्यात पती गोविंद माळी याच्याविरोधात खुनाचा प्रयत्न केल्याचा गुन्हा दाखल करण्यात आला आहे. या घटनेनंतर पोलिसांनी तपासाची चक्रे फिरवीत गोविंद माळी यास येवल्यातून शिताफीने ताब्यात घेत गजाआड केले. सध्या पीडितेवर मालेगाव येथे उपचार सुरू आहेत. घटनेचा पुढील तपास पोलिस निरीक्षक दिगंबर भदाणे सहाय्यक पोलिस निरीक्षक सुनील बढे हे करीत आहेत.
