नोकरी बदलणार्या सदस्यांसाठी पीएफ खाते ट्रान्स्फर करण्याच्या प्रक्रियेत कर्मचारी भविष्य निधी संघटनेने सुलभता आणली आहे. त्यांच्या निवेदनानुसार काही प्रकरणात पीएफ खाते स्थानांतरित करण्यासाठी जुन्या किंवा नव्या कंपनीकडे ऑनलाईन अर्ज भरण्याची गरज नाही.
खासगी कंपनीत सेवारत असणारे कर्मचारी चांगल्या वेतनापोटी कंपनी बदलत असतात. अशावेळी भविष्य निर्वाह निधी खाते स्थानांतरित करण्याचे काम ताणाचे राहू शकत; पण या क्षेत्रात काम करणार्या कर्मचार्यांसाठी एक चांगली बातमी आहे. खासगी क्षेत्रातील कर्मचार्यांच्या मूळ वेतनावर बारा टक्के पीएफ कापून घेतला जातो आणि तेवढीच रक्कम ही कंपनीकडून कर्मचार्यांच्या पीएफ खात्यात जमा केली जाते. कंपनीकडून जमा होणार्या पैशात 8.33 टक्के वाटा ईपीएसमध्ये (कर्मचारी पेन्शन योजना), तर उर्वरित 3.67 टक्के वाटा हा ईपीएफमध्ये जातो. नव्या नियमानुसार, सदस्य स्वत:च खाते ट्रान्स्फर करण्यासाठी दावा करू शकतात. अर्जाची प्रक्रिया करण्याची आवश्यकता नाही. एकप्रकारे नोकरी बदलल्यानंतर सदस्यांना जुन्या किंवा नव्या कंपन्यांमार्फत प्रॉव्हिडंड फंड ट्रान्स्फर करण्याचा नियम काही प्रकरणात बासनात गुंडाळून ठेवला आहे.
भविष्य निर्वाह निधी संघटननेने पंधरा जानेवारी रोजी एक अधिसूचना जारी केली. यात नोकरी बदलल्यास पीएफ खाते स्थानांतर करण्याची प्रक्रिया सुलभ केली आहे. याप्रमाणे विद्यमान किंवा नव्या कंपनीकडून पीएफ खाते ट्रान्स्फर करण्याचा अधिकार संपुष्टात आणला आहे.
युनिव्हर्सल अकाऊंट नंबर बारा अंकी संख्या असून तो इपीएफमध्ये योगदान देणार्या प्रत्येक कर्मचार्याला दिला जातो. कर्मचारी भविष्य निधी संघटनेकडून हा क्रमांक दिला जातो.
एकच यूएएनअंतर्गत ट्रान्स्फर : सदस्याला युनिव्हर्सल अकाऊंट नंबर 1 ऑक्टोबर 2017 रोजी किंवा त्यानंतर दिलेला असेल आणि तो आधार नंबरशी जोडलेला असेल, तर आणि यानुसार एकच यूएएन नंबर असलेल्या सदस्याला पीएफ खाते स्थानांतर करायचे असेल, तर त्यास नव्या नियमांचा लाभ मिळणार आहे.
विविध यूएएनदरम्यान ट्रान्स्फर (दोन्ही यूएएन 1 ऑक्टोबर 2017 रोजी किंवा त्यानंतर जारी केलेला असेल तर) : कर्मचार्याकडे एकाच आधारशी संबंधित अनेक यूएएन जोडलेले असतील आणि सिस्टीम त्यास एकच व्यक्ती म्हणून ओळखत असेल, तर कंपनीच्या हस्तक्षेपाशिवाय सीमलेस ट्रान्स्फर करण्याची परवानगी मिळते.
एकच यूएएनअंतर्गत ट्रान्स्फर (1 ऑक्टोबर 2017 पूर्वी जारी केलेला यूएएन) : जुन्या यूएएनसाठी पीएफ ट्रान्स्फर करायचे असेल, तर त्यासाठी आधार जोडलेला असणे आवश्यक आहे आणि मेंबरच्या आयडीतील विवरण हे मिळतेजुळते असणे आवश्यक आहे. यात सदस्याचे नाव, जन्मतारीख आणि लिंग सारखे असणे आवश्यक आहे. वैयक्तिक माहितीही सर्व ठिकाणी सारखी असावी.
विविध यूएएनदरम्यान ट्रान्स्फर (1 ऑक्टोबर 2017 पूर्वी जारी केलेले यूएएन): अनेक यूएएनमध्ये (एक जुने) पीएफ ट्रान्स्फरची परवानगी आहे; मात्र दोन्ही यूएएन एकाच आधारशी जोडलेले असतील आणि व्यक्तिगत विवरण मिळतेजुळते असेल तर.
यानुसार सर्व प्रकरणात यूएएन आधारशी जोडलेले असेल आणि वैयक्तिक माहिती मिळतीजुळती असेल, तर कंपनीच्या पडताळणीशिवाय वेगाने पीएफ ट्रान्स्फर होण्याची प्रक्रिया पार पडेल.
