When should a baby be given eggs? New research has eased parents' concerns
पुढारी ऑनलाईन : लहान बाळांना कोणत्या वयात कोणते अन्न द्यावे, याबाबत अनेक पालकांच्या मनात प्रश्न असतात. विशेषतः अंड्याबाबत अनेकांना भीती वाटते की त्यामुळे बाळाला ॲलर्जी होऊ शकते. मात्र, नुकत्याच प्रकाशित झालेल्या एका जागतिक संशोधनाने हा समज चुकीचा ठरवला आहे.
'JAMA Pediatrics' मध्ये प्रकाशित झालेल्या अहवालानुसार, बाळांना 6 ते 8 महिन्यांच्या दरम्यान अंडे खायला देण्यास सुरुवात केल्यास भविष्यात अंड्याची ॲलर्जी होण्याचा धोका कमी होऊ शकतो.
पूर्वी असा समज होता की अंडे आणि इतर ॲलर्जी निर्माण करणारे पदार्थ उशिरा द्यावेत, विशेषतः कुटुंबात अॅलर्जीचा इतिहास असल्यास. मात्र, नवीन संशोधनानुसार हे पदार्थ योग्य वयात आणि हळूहळू आहारात समाविष्ट केल्यास त्याचे फायदे होऊ शकतात.
ऑस्ट्रेलियामध्ये करण्यात आलेल्या या अभ्यासात असे दिसून आले की, ज्या बाळांना 6 ते 8 महिन्यांच्या वयात अंडे देण्यास सुरुवात करण्यात आली, त्यांच्यामध्ये अंड्यामुळे होणाऱ्या ॲलर्जीेचे प्रमाण कमी होते. हा परिणाम विशेषतः एक्झिमा (त्वचेचा विकार) असलेल्या मुलांमध्ये अधिक स्पष्टपणे दिसून आला.
तज्ज्ञांच्या मते, लहान वयात ॲलर्जी निर्माण करू शकणारे पदार्थ दिल्यास बाळाची रोगप्रतिकारक शक्ती (इम्यून सिस्टम) त्या पदार्थांना ओळखायला आणि स्वीकारायला शिकते. त्यामुळे पुढे ॲलर्जी होण्याची शक्यता कमी होते.
अभ्यासानुसार, अंडे उशिरा देण्याऐवजी सुमारे 6 महिन्यांच्या वयात सुरू केल्यास अंड्याच्या ॲलर्जीच्या घटनांमध्ये 17% पेक्षा जास्त घट दिसून आली. सामान्य मुलांमध्येही काही प्रमाणात फायदा दिसून आला.
संशोधनानुसार, बाळाला अंडे देण्याची सर्वोत्तम वेळ 6 ते 8 महिन्यांच्या दरम्यान आहे. हे पूर्वीच्या सल्ल्यापेक्षा वेगळे आहे, ज्यामध्ये 10 महिने, 1 वर्ष किंवा त्यानंतर अंडे देण्याची शिफारस केली जात असे.
डॉक्टरांच्या मते, सुरुवातीला अंडे पूर्णपणे शिजवूनच द्यावे. कच्चे किंवा अर्धवट शिजलेले अंडे दिल्यास संसर्ग आणि अॅलर्जीचा धोका वाढू शकतो.
अंड्याची सुरुवात अगदी कमी प्रमाणात करावी. उदाहरणार्थ:
अर्ध्या अंड्याचा पिवळा बलक (योल्क) मॅश करून दूध किंवा पाण्यात मिसळून द्या.
बाळाला ते सहज पचत असल्यास हळूहळू प्रमाण वाढवा.
कुटुंबात ॲलर्जीचा इतिहास असल्यास अंडे सुरू करण्यापूर्वी डॉक्टरांचा सल्ला घ्या.
हे संशोधन सूचित करते की, योग्य वेळी आणि योग्य पद्धतीने अंडे आहारात समाविष्ट केल्यास बाळांच्या आरोग्यास फायदा होऊ शकतो आणि भविष्यात अंड्याचीॅ ॲलर्जी होण्याचा धोका कमी होऊ शकतो. त्यामुळे पालकांनी अनाठायी भीती न बाळगता तज्ज्ञांच्या मार्गदर्शनाखाली बाळाच्या आहारात अंड्याचा समावेश करावा.
