दिल्लीत छत्रपती संभाजी महाराज जयंती उत्साहात साजरी

नवी दिल्ली, पुढारी वृत्तसेवा : देशाची राजधानी दिल्लीमध्ये छत्रपती संभाजी महाराज जयंती रविवारी मोठ्या उत्साहात साजरी करण्यात आली. अ. भा. छत्रपती संभाजी महाराज जयंती महोत्सव समितीच्या वतीने नवीन महाराष्ट्र सदनात हा कार्यक्रम झाला.

महाराष्ट्रासह पानिपत, इंदुर, कर्नाटक, मध्य प्रदेश आणि दिल्लीच्या विविध भागातील 'शंभुप्रेमी' कार्यक्रमास उपस्थित होते. 1996 साली छ. संभाजीनगर येथे प्रथम छ. संभाजी महाराज जयंती साजरी करण्यात आली होती. त्यानंतर राज्यभर जयंती साजरी करण्यासाठी समितीच्या वतीने राज्य शासनाकडे पाठपुरावा करण्यात आला होता. या पार्श्वभूमीवर चालू वर्षापासून सर्वत्र छ. संभाजी महाराज जयंती साजरी करण्याचा निर्णय राज्य सरकारने घेतला होता.

दरम्यान महाराष्ट्र सदनात सहायक निवासी आयुक्त डॉ. राजेश अडपावार यांनी छत्रपती संभाजी महाराज यांच्या प्रतिमेस पुष्पहार अर्पण करून अभिवादन केले. यावेळी परिचय केंद्राच्या प्रभारी उपसंचालक अमरज्योत अरोरा तसेच सदनाचे अधिकारी व कर्मचारी उपस्थित होते.