बंगळूर : राज्यातील मंत्रिमंडळ स्थापनेनंतर मतभेद आणि राजीनामासत्राने जोर धरला आहे. अशा परिस्थितीत सार्वजनिक बांधकाम मंत्री सतीश जारकीहोळी यांनी आपल्याला मिळालेल्या मंत्रिपदाबाबत ना दुःखी, ना आनंदी आहे, अशी तटस्थ प्रतिक्रिया पत्रकारांशी बोलताना दिली. ज्येष्ठ नेत्यांमधील असंतोषाची आग विझवण्याची पूर्ण क्षमता माजी मुख्यमंत्री सिद्धरामया यांच्यात आहे, असेही ते म्हणाले.
ज्येष्ठ नेते रामलिंगा रेड्डी यांनी मंत्रिपदाचा राजीनामा दिल्याबाबत विचारलेल्या प्रश्नाला उत्तर देताना मंत्री जारकीहोळी म्हणाले, त्यांनी राजीनामा दिला आहे. ही संपूर्ण परिस्थिती हाताळण्याची आणि पर्यायी व्यवस्था करण्याची पूर्ण क्षमता सिद्धरामया यांच्यात आहे. पुढील काही दिवसांत या सर्व समस्यांचे निराकरण होईल.
मंत्री के. एच. मुनियप्पा यांच्या नाराजीबाबत बोलताना ते म्हणाले, राजकारणात पदोन्नती किंवा उच्च पदांची इच्छा असणे ही अतिशय सामान्य बाब आहे. मात्र, प्रत्येकालाच उच्च पदे देणे शक्य नसते. मुख्यमंत्री या सर्व गोंधळाचे निवारण करतील, तोपर्यंत आपण वाट पाहूया.
उपमुख्यमंत्री किंवा केपीसीसी अध्यक्षपद न मिळाल्यामुळे आपण नाराज आहात का, असे विचारले असता त्यांनी मोकळेपणाने उत्तर दिले. ते म्हणाले, माझी तशी इच्छा होती, पण आता मी त्यात काहीच करू शकत नाही. जे मिळाले आहे त्यातच मी आनंदी आणि समाधानी राहिले पाहिजे. राजीनाम्याच्या शक्यतेचा स्पष्टपणे इन्कार करताना ते म्हणाले, मी राजीनामा का देऊ? त्याची काहीच गरज नाही.
