निपाणी : पुणे-बंगळूर राष्ट्रीय महामार्गावर तवंदी घाट येथे बुधवारी सायंकाळी ४ ते ६ या वेळेत ढगफुटी सदृश्य तुफान पाऊस झाला. यावेळी घाटमाथ्यावरून पडणारे पाणी महामार्गावरून वाहू लागल्याने या मार्गावरून होणारी वाहतूक काहीकाळ विस्कळीत झाली होती. दरम्यान परिस्थितीचे गांभीर्य ओळखून रस्ते देखभाल अवताडे कंपनीच्या भरारी पथकासह शहर व संकेश्वर पोलिसांनी वाहतूक सेवा सुरळीत केली.
सायंकाळी चारच्या सुमारास अचानकपणे मेघ दाटून आल्याने ढगांच्या गडगडाटामध्ये या परिसरात पावसाला सुरुवात झाली. बघता बघता तासभर हा पाऊस ढगफुटी सदृश्य तुफान झाल्याने घाटमाथ्यावरून पावसाच्या पाण्यातून दगड माती वाहत येवून महामार्गावर येत असल्याचे लक्षात येताच तातडीने घटनास्थळी रस्ते देखभाल अवताडे कंपनीच्या भरारी पथकाचे निरीक्षक अक्षय सारापूरे यांनी घटनास्थळी कर्मचाऱ्यांचे भेट देऊन वाहतुकीवर परिणाम होऊ नये, यासाठी प्रयत्न केले.
दरम्यान पोलीस व रस्ते देखभाल कंपनीच्या भरारी पथकाने महामार्गावर वाहणाऱ्या पाण्याला वाट करून देत वाहतूक धिम्या गतीने सुरू ठेवली. केवळ कणगला फाटा ते हॉटेल अमर या भागात हा पाऊस झाला. दरम्यान या काळात अनेक वाहनधारकांनी परिस्थितीचे गांभीर्य ओळखून सुरक्षितता म्हणून आपली वाहने रस्त्याच्या बाजूला उभी करून काही काळ थांबणे पसंत केले.
सध्या तवंदी घाटात कोल्हापूर ते बेळगाव या मार्गावर एका बाजूला उड्डाणपुलासह फ्लायव्होवरचे बांधकाम सुरू आहे. त्यामुळे सद्यस्थितीत एकेरी मार्गाने दोन्ही बाजूची वाहतूक सुरू आहे. त्या दृष्टीने प्रशासनाने ठिकठिकाणी सूचनाफलक उभे करून वाहनधारकांना सुरक्षितता प्राप्त करून दिली आहे. बुधवारी सायंकाळी झालेल्या तुफान ढगफुटी सदृश्य पावसाचा व्हिडिओ सोशल मीडियावर चांगलाच व्हायरल झाला होता. याची चर्चा परिसरात सुरू होती.
