काशिनाथ सुळकुडे
चिकोडी : एखादा गुन्हा केल्यानंतर पोलिसांनी न्यायालयाच्या आदेशानुसार गुन्हेगारांना कारागृहात डांबले जाते. या कैद्यांनी चक्क कारागृहातील जेलर अर्थात कारागृह अधिकाऱ्याला मारहाण केल्याची धक्कादायक घटना कर्नाटकातील बागलकोट जिल्ह्यातील जमखंडी उप-कारागृहात घडली.
संध्याकाळी जमखंडी शहरातील कारागृहात एका क्षुल्लक कारणावरून विचाराधीन कैद्यांमध्ये हाणामारी झाली. परिस्थिती नियंत्रणात आणण्यासाठी आणि कैद्यांना शांत करण्यासाठी गेलेले जेलर अर्थात तुरुंग रक्षक व्ही. डी. कुंभार यांच्यावर कैद्यांच्या एका टोळीने अचानक हल्ला केला. कैद्यांनी केलेल्या मारहाणीमुळे तुरुंग रक्षकांचा डावा हात फ्रॅक्चर झाला आहे. यामुळे त्यांना गंभीर दुखापत झाली. त्यांना तातडीने जमखंडी शहरातील एका खाजगी रुग्णालयात दाखल करण्यात आले असून, त्यांच्यावर सध्या उपचार सुरू आहेत.
महालिंगापूर पोलीस ठाण्याच्या हद्दीत रेशन तांदळाच्या अवैध वाहतुकीच्या प्रकरणात अटक करण्यात आलेले झाकीर हुसेन मकंदर, फय्याज मकंदर, अशोक नायकोडी आणि अर्पत तालिकोटी असे आरोपींचे नावे आहेत. आता तुरुंगातही आपले धाडस दाखवणाऱ्या या टोळीविरोधात आणखी एक गुन्हा दाखल करण्यात आला आहे. या घटनेसंदर्भात जमखंडी ग्रामीण पोलीस ठाण्यात तक्रार दाखल करून तपास करीत आहेत.
