Karnataka Crime: हुबळीत दुचाकी अडवून युवकाचा भररस्त्यात खून

हुबळी : हुबळी येथे भरदिवसा रस्त्यावर एका युवकाचा तलवारीने वार करून खून करण्यात आला आहे. शुक्रवारी दुपारी येथील लिंगराजनगर बनशंकरी वसाहत परिसरात ही घटना घडली.

दादापीर इस्माईलसाब उदयकर (वय ३३, रा. गिरीयाल रोड, शिवसोमेश्वरनगर, हुबळी) असे खून झालेल्या युवकाचे नाव आहे. तो मूळचा हुबळीचा रहिवासी असला तरी सध्या कलघटगी तालुक्यातील बोगेनागरकोप्प येथे रहात होता.

दादापीर बनशंकरी वसाहत परिसरात दुचाकीवरून चालला असताना तिघांनी दुचाकी अडवून तलवार व इतर तीक्ष्ण हत्याराने हल्ला केला. घटनेवेळी परिसरात बऱ्यापैकी वर्दळ होती. तरीही भर रस्त्यात सपासप वार करून खून करण्यात आला. त्यामुळे परिसरात भीतीचे वातावरण पसरले होते. खून करून आरोपी पसार झाले असून पोलिस त्यांचा शोध घेत आहेत.