बंगळूर : गेल्या दीड महिन्यापासून रखडलेली राज्य मंत्रिमंडळ विस्ताराची प्रक्रिया सुरू करण्यात आली आहे. हायकमांडने १४ नवीन चेहऱ्यांना मंत्रिमंडळात संधी देण्याचा निर्णय घेतला असून, २० रिक्त पदे भरण्याचा निर्णय घेतला आहे.
मागील आठवड्यात लोकसभेतील विरोधी पक्षनेते खा. राहुल गांधी यांनी मुख्यमंत्री डी. के. शिवकुमार, माजी मुख्यमंत्री सिद्धरामय्या आणि केपीसीसी अध्यक्ष बी. के. हरिप्रसाद यांना दिल्लीत बोलावून मंत्रिमंडळ विस्तारावर चर्चा केली होती. त्यांनी त्यांच्याकडून संभाव्य उमेदवारांची यादीही स्वीकारली होती. ही यादी त्यांनी खासदार शशिकांत सेंथिल यांच्या अध्यक्षतेखालील छाननी समितीकडे पाठवली आहे. त्यांनी निर्देश दिले आहेत की, मंत्रिमंडळ विस्तारात सक्षम असलेल्या नेत्यांना स्थान द्यावे, ते पक्षाच्या तत्त्वांशी वचनबद्ध असावेत, त्यांच्यावर पक्षविरोधी कामाचे कोणतेही आरोप नसावेत, ते दोनपेक्षा जास्तवेळा विधानसभेत निवडून आलेले असावेत, ते ज्या जातीचे आणि भागाचे प्रतिनिधित्व करतात त्याचा विचार केला जावा आणि त्यांचे वय ५० वर्षांपेक्षा कमी असावे.
या आधारावर शशिकांत सेंथिल यांच्या नेतृत्वाखाली राहुल गांधी यांना एक अहवाल सादर करण्यात आला आहे. सध्याच्या सरकारचा हा कदाचित शेवटचा मंत्रिमंडळ विस्तार असेल. त्यामुळे आगामी विधानसभा आणि लोकसभा निवडणुका लक्षात घेऊन पक्ष संघटनेला फायदा होईल, अशा पद्धतीने मंत्रिमंडळ विस्तार करण्यात येणार आहे. सेंथिल यांच्या नेतृत्वाखालील समितीने अभ्यास करून एक अहवाल सादर केला आहे, ज्यात म्हटले आहे की, विस्तारादरम्यान कोणत्याही मतभेदांना वाव राहू नये. जो व्यक्ती मंत्री होईल, त्याने काँग्रेस संघटनेला फायदा झाला पाहिजे आणि त्या व्यक्तीचा समाज पक्षासोबत उभा राहिला पाहिजे.
या आधारावर राहुल गांधी यांनी १४ नवीन नेत्यांना संधी देण्याचा निर्णय घेतला आहे. ते एआयसीसी अध्यक्ष मल्लिकार्जुन खर्गे यांच्याशी सल्लामसलत करून यादी अंतिम करतील. गरज भासल्यास या चर्चेदरम्यान मुख्यमंत्री डी. के. शिवकुमार यांना चर्चेच्या आणखी एका फेरीसाठी दिल्लीत बोलावले जाऊ शकते. अन्यथा ही यादी बुधवारी संध्याकाळी किंवा गुरुवारी सकाळी पाठवली जाईल, असे समजते आहे. मुख्यमंत्री डी. के. शिवकुमार त्या यादीच्या आधारे मंत्रिमंडळ विस्तार करतील.
