बंगळूर : नीट पेपरफुटीवरून देशभर पसरलेले आंदोलन संपले असून, दिल्लीतील वातावरणही निवळले आहे. त्यामुळे, राज्य मंत्रिमंडळ विस्ताराची पुन्हा चर्चा सुरू झाली आहे. मुख्यमंत्री डी. के. शिवकुमार सोमवारी (दि. २७) दिल्लीला जाणार असून, पक्षश्रेष्ठींची भेट घेणार आहेत. ते मंत्रिमंडळ विस्तारासाठी पक्षश्रेष्ठींचा हिरवा कंदील मिळवण्याची शक्यता आहे.
मुख्यमंत्री शिवकुमार आणि राज्यातील नेते दिल्लीला जाणार आहेत. सोमवारी संध्याकाळी मुख्यमंत्री कर्नाटक भवनात केंद्रीय मंत्री आणि कर्नाटकातील खासदारांसोबत बैठक घेणार आहेत. त्यानंतर, मंगळवारी ते काँग्रेसच्या पक्षश्रेष्ठींची भेट घेऊन प्रलंबित मंत्रिमंडळ विस्तारासाठी परवानगी मिळवण्याची शक्यता आहे. सूत्रांनी दिलेल्या माहितीनुसार ते खासदार राहुल गांधींसोबत इच्छुकांच्या यादीवर चर्चा करून ती अंतिम करतील. बुधवार किंवा गुरुवारपर्यंत मंत्रिमंडळ विस्तार होण्याची शक्यता असल्याचे काँग्रेसच्या सूत्रांनी सांगितले आहे. त्यामुळे, इच्छुकांनी पुन्हा एकदा मंत्रिपदासाठी धावपळ सुरू केली आहे. काही आमदार दिल्लीला जाऊन मंत्रिपदासाठी लॉबिंग करणार आहेत.
गेल्या आठवड्यात, नीट प्रश्नपत्रिका फुटीप्रकरणी खासदार राहुल गांधींनी पुकारलेल्या लढ्यामुळे मंत्रिमंडळ विस्तारावर चर्चा होऊ शकली नाही. यामुळे मुख्यमंत्री शिवकुमार, माजी मुख्यमंत्री सिद्धरामय्या आणि केपीसीसी अध्यक्ष बी. के. हरिप्रसाद यांना माघारी परतावे लागले होते. सध्या नीटचा वाद मिटल्याने मुख्यमंत्री शिवकुमार खासदार गांधी यांची भेट घेणार आहे. ते मंत्रिमंडळ विस्तारासाठी परवानगी घेऊन मंत्र्यांची अंतिम यादी निश्चित करतील आणि परततील, असे सांगण्यात येत आहे.
मंत्रिमंडळ विस्तार कोणत्याही क्षणी होऊ शकतो, असे एआयसीसीचे सरचिटणीस के. सी. वेणुगोपाल यांनी यापूर्वीच सांगितले असल्याने मंत्री पदासाठी इच्छुक आमदारांना आशा निर्माण झाली आहे. त्यांनी मंत्रिपदासाठी प्रयत्न सुरू केले आहेत. पहिल्या आणि दुसऱ्यांदा निवडून आलेल्या १५ हून अधिक आमदारांचा एक गट थेट मुख्यमंत्र्यांना भेटून लॉबिंग करत आहे. मंत्रिमंडळात तरुण आणि नवीन चेहऱ्यांना प्राधान्य देण्याची त्यांनी विनंती केली आहे. दुसरीकडे ज्येष्ठ नेतेही मंत्रिपदाच्या शर्यतीत असून, हायकमांडबरोबरच्या बैठकीनंतर मंत्रिमंडळात कोणाला स्थान मिळेल, हे लवकरच स्पष्ट होईल.
