Karnataka Accident : राजहंसगडचा तरुण दुचाकी अपघातात ठार

खानापूर : मित्रांसोबत धाब्यावर जेवण करुन घरी परतणाऱ्या युवकाच्या दुचाकीला अपघात होऊन तो जागीच ठार झाला. मंगळवारी, (दि. २०) रात्री साडेअकराच्या सुमारास बेळगाव-गोवा महामार्गावरील प्रभूनगरजवळ हा अपघात झाला.

नारायण परशराम कुंडेकर (वय ३७, रा. महादेव गल्ली, राजहंसगड, बेळगाव) असे त्याचे नाव आहे. नारायण हा आपल्या दुचाकीवरुन तर त्याचे मित्र कारमधून गणेबैलजवळील धाब्यावर जेवणासाठी आले होते. जेवण करुन परतताना रस्त्यावरील गतिरोधकाचा अंदाज न आल्याने नारायणची दुचाकी घसरली. डोक्याला, हाताला आणि पोटाला गंभीर मार लागला. त्यातच तो जागीच ठार झाला. याबाबत खानापूर पोलिसात अपघाताची नोंद झाली आहे.