बेळगाव : शहरात मांजाने विद्यार्थ्याचा बळी गेल्याची घटना ताजी असताना अनगोळातील नाथ पै तलावात बदकांची अंडी काढण्यासाठी गेलेल्या युवकाचा शनिवारी सकाळी बुडून मृत्यू झाला.
मृत युवकाचे नाव सतीश शशिकांत कदम (३०, रा. लोहार गल्ली, अनगोळ) असे आहे. तो तलावात बदकाची अंडी शोधण्यासाठी उतरला होता, अशी माहिती मिळाली. त्याला चांगले पोहता येत होते. मात्र तलावात मोठ्या प्रमाणात कमळाच्या वेली आहेत. त्या वेलीत पाय अडकल्याने त्याला पोहता आले नाही आणि त्याचा मृत्यू झाला असावा, असा अंदाज पोलिसांनी व्यक्त केला आहे.
सतीश सकाळीच तलावाकडे गेला होता. अंगावरील कपडे उतरवून तलावात उतरलेला सतीश बराचवेळ बाहेर आला नाही. त्यामुळे त्याच्या घरच्यांनी शोध घेतला असता तलावाच्या काठावर त्याचे कपडे आणि चप्पल दिसून आले. त्यामुळे तत्काळ पोलिसांना माहिती देण्यात आली. उद्यमबाग पोलिसांनी घटनास्थळाकडे धाव घेतली. त्यानंतर एचईआरएफ या एनजीओच्या कार्यकर्त्यांकडे मदत मागण्यात आली. एचआरईएफच्या कार्यकर्त्यांनी अर्ध्या तासाच्या शोधकार्यानंतर सतीशचा मृतदेह बाहेर काढला. पोलिसांनी मृतदेह चिकित्सेसाठी जिल्हा रुग्णालच्या शवागारात पाठवला.
