बेळगाव : दुचाकी चोरीप्रकरणी पोलिसांनी दोघांना अटक करून त्यांच्याकडून दोन मोटारसायकली आणि दोन मोटारसायकल इंजिने असा एकूण १ लाख ७ हजार रुपयांचा मुद्देमाल जप्त केला आहे. अंकलगी पोलीस ठाण्यात दुचाकी चोरीचा गुन्हा दाखल होता.
या प्रकरणाचा तपास सुरू करत असताना पोलिसांना मिळालेल्या गुप्त माहितीच्या आधारे २३ मे रोजी छापा टाकून परशुराम उर्फ परसू यल्लाप्पा हनबरहट्टी (वय २२) आणि ईरप्पा तमान्ना मल्लनावर (वय २८ दोघेही रा. कुंदरगी, ता. गोकाक) यांना अटक करण्यात आली. चौकशीत त्यांनी दुचाकी चोरीची कबुली दिली.
आरोपींकडून जप्त करण्यात आलेल्या मुद्देमालात हिडकल धरण परिसरातून चोरीस गेलेली हिरो स्प्लेंडर प्लस मोटारसायकल, होळेव्वा मंदिराजवळून चोरीस गेलेली हिरो मोटारसायकल तसेच दोन गुन्ह्यातील मोटारसायकलींची इंजिने यांचा समावेश आहे. गोकाक उपविभागाचे डीवायएसपी रवी डी. नाईक, पोलीस निरीक्षक आर. बी. सुरेशबाबू यांच्या नेतृत्वाखाली अंकलगी पोलीस उपनिरीक्षक यमनप्पा मांग आणि त्यांच्या पथकाने ही कारवाई केली.
