बेळगाव: पुढारी वृत्तसेवा: हिवाळी अधिवेशनाच्या पार्श्वभूमीवर बेळगावमध्ये सुवर्ण विधानसौध समोर पंचमसाली समाजाने आरक्षणाच्या मागणीसाठी सुरु केलेल्या आंदोलनाला आज (दि.१०) गालबोट लागले. घेराव घालण्याच्या प्रयत्नातील आंदोलकांवर पोलिसांनी लाठीचार्ज केला. (Belgaum News ) त्यावेळी आंदोलनात काही नेत्यांनाही अटक करण्यात आली आहे.
पंचमसाली समाजाला 2 ए श्रेणीतील आरक्षण मिळावे, त्यासाठी कुडलसंगम पिठाचे बसवजय मृत्युंजय स्वामी यांच्या नेतृत्वाखाली समाजातील अनेक नेत्यांनी हजारोंच्या उपस्थितीत आज सुवर्ण सौध परिसरात भव्य आंदोलन छेडण्यात आले.
कोंडुस कोप्पहुन सुवर्णसौधला घेराव घालण्यासाठी मोठ्या प्रमाणात कार्यकर्त्यांनी आगेकूच करताच पोलिसांनी लाठीचार्ज सुरु केला. त्यावेळी आंदोलकांनी राष्ट्रीय महामार्ग रोखण्याचा प्रयत्न केला. आंदोलकांनी घोषणाबाजी करत निदर्शने करणार्या आंदोलकांवर अखेर पोलिसांनी लाठीचार्ज सुरु केला.
यावेळी पोलीस आयुक्त याडा मार्टिन मार्बिंयाग देखील यावेळी स्वतः हजर होते. सुमारे दहा हजारहून अधिक आंदोलक यावेळी उपस्थित होते. पोलिसांनी केलेला या लाठी हल्ल्यात अनेक जण जखमी झालेले आहेत.
या आंदोलनातील कुडलसंगम पिठाचे बसवजय मृत्युंजय स्वामी यांच्यासह विजयपूरचे आमदार बसनगौडा पाटील यत्नाळ, राज्यसभा सदस्य इराण्णा कडाडी, आम. अरविंद बेल्लद आदींना पोलिसांनी ताब्यात घेतले होते.
