बेळगाव : मराठीद्वेषाने पछाडलेल्या महापालिकेची वक्रद़ृष्टी आता शहरातील सार्वजनिक गणेशोत्सव मंडळांच्या मराठी फलकांवर पडली आहे. शुक्रवारी (दि. 25) पाटील गल्ली सार्वजनिक गणेशोत्सव मंडळाने शहीद भगतसिंग चौकात उभारलेला मराठी फलक हटविला. फलक फक्त मराठीत आहे, कन्नड शब्द त्यावर नाहीत, असे कारण देण्यात आले. तथापि, कन्नड भाषेची सक्ती करणारा आदेश केवळ नामपाट्यांपुरताच मर्यादित असतानाही महापालिकेने शहरात मनमानी सुरू केली आहे. त्यामुळे तीव्र संताप व्यक्त होत आहे.
गणेशोत्सव एक महिन्यावर येऊन ठेपला आहे. गणेशोत्सव मंडळांनी पाटपूजा करून आगमन सोहळ्याची तयारी सुरू केली आहे. ठिकठिकाणी फलक उभारले आहेत; पण हे फलक आता महापालिकेला खुपू लागले आहेत. कर्नाटक सरकारने व्यापारी आस्थापन कायद्यानुसार दुकानांवर असलेल्या नामफलकांवर 60 टक्के कन्नड भाषेची सक्ती केली आहे; पण हा आदेश व्यापारी आस्थापनांपुरता मर्यादित आहे. तो इतर जाहिरातींना किंवा जाहिरात फलकांना, शुभेच्छा फलकांना लागू होत नाही; पण या आदेशाचा बाऊ करत महापालिकेने शहरातील सरसकट सर्वच मराठी फलक हटविण्याचा सपाटा सुरू केला आहे. शिवाय, या कारवाईचे त्यांच्याकडून समर्थनही करण्यात येत आहे. पाटील गल्लीतील गणेशोत्सव मंडळाने चार दिवसांपूर्वी पाटपूजन केले. त्यानंतर आगमन सोहळ्यासाठी चौकात नेहमीप्रमाणे मराठी भाषेत फलक उभारला होता.हा फलक महापालिकेला खुपला.
मनपाच्या पथकाने शुक्रवारी संध्याकाळी तो फलक जप्त केला. फलक जप्त करताना व्यापारी वर्गाने महापालिकेच्या कर्मचार्यांना जाब विचारला. व्यापारी आस्थापनांना लागू असलेला नियम धार्मिक कार्यक्रमांना का लावण्यात येत आहे, असा सवाल करण्यात आला. त्यावर महापालिकेच्या कर्मचार्यांनी ’आम्हाला आदेश असल्यामुळे आम्ही हा फलक हटवत आहोत’, असे उत्तर दिले. आमच्याकडे तक्रार आली आहे, त्यामुळे आम्ही तो हटवत आहोत, असेही सांगितले. तथापि, कोणी तक्रार केली हे स्पष्ट नाही. शिवाय तक्रार केली तरी कायदा काय, याचेही उत्तर कोणाकडे नाही.
फलक हटवत असल्याची माहिती मिळताच सार्वजनिक मध्यवर्ती गणेशोत्सव महामंडळाचे कार्याध्यक्ष रणजीत चव्हाण-पाटील, जनसंपर्क प्रमुख विकास कलघटगी यांनी घटनास्थळी भेट दिली. महापालिकेच्या या मनमानी कारवाईचा निषेध केला. त्यानंतर महामंडळाचे अध्यक्ष रमाकांत कोंडुसकर यांच्या कानावर घालण्यात आली.
गेल्या आठवड्यात शहर पोलिस आयुक्त भूषण बोरसे यांनी गणेशोत्सव मंडळांची बैठक घेतली होती. त्यावेळी गणेशोत्सवात मराठी फलक हटवण्यात येवू नयेत, अशी मागणी केली होती. तर दोन दिवसांत शहापूर विभाग गणेशोत्सव मंडळाची बैठक होणार आहे. पण, गणेशोत्सव ऐन तोंडावर असताना महापालिकेने मात्र भाषिक रंग देत मराठी फलकांना लक्ष्य केल्याचे दिसून येत आहे. त्यामुळे हे प्रकरण तापण्याची चिन्हे आहेत.
पाटील गल्ली गणेशोत्सव मंडळाचा मराठी भाषेतील फलक हटविल्यामुळे सर्वत्र संताप व्यक्त होत असून, या प्रकाराविरोधात सार्वजनिक मध्यवर्ती गणेशोत्सव मंडळाचे पदाधिकारी सोमवारी (दि. 28) महापालिका आयुक्तांची भेट घेणार असल्याचे सांगण्यात आले.
