हैदराबाद ; वृत्तसंस्था : तेलंगणाची राजधानी हैदराबादमध्ये काही दिवसांपूर्वीच एका अल्पवयीन मुलीवर सामूहिक बलात्कार झाल्याची घटना ताजी असतानाच शहरात आणखी चार अल्पवयीन मुलींवर सामूहिक बलात्कार झाल्याचे प्रकरण समोर आले आहे. या घटनांमुळे हैदराबाद हादरले आहे.
एका 12 वर्षीय मुलीवर आजीच्या घरी जात असताना दोन नराधमांनी लैंगिक अत्याचार केल्याची घटना घडली होती. 31 मे रोजी मुलगी बेपत्ता झाल्याची तक्रार दाखल झाली होती. सुलतानशाही परिसरात 1 जून रोजी गस्तीवर असलेल्या पोलिसांना ती आढळून आली होती. कॅब चालकाने तिला कोंडुर्ग येथे एका मैत्रिणीच्या घरी नेले आणि तिथे दोघांनी तिच्यावर लैंगिक अत्याचार केला. दुसर्या दिवशी सकाळी त्यांनी तिला सोडले. या घटनेत शेख कलीम अली आणि मोहम्मद लुकमान अहमद यझदानी या 36 वर्षीय आरोपींना अटक करण्यात आली आहे.
घरी नेऊन लैंगिक अत्याचार
दुसरी घटना एका किरकोळ दुकानात काम करणार्या मुलीची आहे. 31 मे रोजी 21 वर्षीय मोहम्मद सुफयानने तिला घरी नेले आणि तिच्यावर लैंगिक अत्याचार केला. तिसर्या घटनेत एका अनाथाश्रमातील एका अल्पवयीन मुलीवर 22 एप्रिल रोजी कारमध्ये बलात्कार करण्यात आला होता. ही घटना नुकतीच उघडकीस आली आहे. केक विकत घेण्याच्या बहाण्याने आणि पीडितेशी एकांतात बोलण्याच्या बहाण्याने आरोपींनी कारमध्ये तिच्यावर बलात्कार केला. या प्रकरणी 23 वर्षीय आरोपी सुरेशला पोलिसांनी अटक केली आहे.
चौथ्या घटनेत एका अल्पवयीन मुलीवर चित्रपट दाखवण्याच्या बहाण्याने बलात्कार केल्याची घटना घडली आहे.
भाजप आमदाराविरुद्ध हैदराबादेत गुन्हा नोंद
हैदराबादमधील अल्पवयीन मुलीवरील सामूहिक अत्याचार प्रकरणाशी संबंधित काही फोटो आणि व्हिडीओ प्रसिद्ध केल्याबद्दल भाजप आमदार रघुनंदन राव यांच्यावर गुन्हा दाखल करण्यात आला आहे.