पुणे ; पुढारी वृत्तसेवा : श्रीमंत दगडूशेठ हलवाई गणपती मंदिराला राष्ट्रवादी काँग्रेसचे अध्यक्ष शरद पवार यांनी शुक्रवारी भेट दिली. मात्र त्यांनी मंदिरात न जाता दुरूनच दगडूशेठ हलवाई गणपतीचे दर्शन घेतले. यावेळी गृहमंत्री दिलीप वळसे-पाटील त्यांच्यासोबत होते. दरम्यान, शरद पवार यांनी मांसाहार सेवन केला असल्याने ते मंदिरात गेले नाहीत. चुकीचा पायंडा पडता कामा नये, असे त्यांनी मला सांगितले, अशी माहिती पुणे राष्ट्रवादीचे शहराध्यक्ष प्रशांत जगताप यांनी दिली.
मंदिर परिसरात येणार्या भाविक महिलांकरिता स्वच्छतागृह, स्तनपान कक्ष, प्रथमोपचार सुविधा परिसरात कशा प्रकारे उपलब्ध होईल, याविषयी यावेळी चर्चा झाली. त्यानंतर मंदिराच्या मुख्य प्रवेशद्वारासमोर पवार यांनी गणरायाचे मुखदर्शन घेतल्यानंतर त्यांचा व दिलीप वळसे-पाटील यांचा ट्रस्टतर्फे सन्मान करण्यात आला.