मुंबई ; पुढारी वृत्तसेवा : बुली बाई अॅप प्रकरणात तिसर्या आरोपीस उत्तराखंड येथून मुंबई पोलिसांच्या सायबर सेल पोलिसांनी अटक केली. मयांक रावत असे या आरोपीचे नाव असून तो इंजिनिअर आहे. ट्रान्झिट रिमांडवर त्याला पुढील चौकशीसाठी मुंबईत आणले जाणार आहे. त्याच्या अटकेने या गुन्ह्यात अटक झालेल्या आरोपींची संख्या आता तीन झाली आहे. या गुन्ह्यात यापूर्वी विशाल झा आणि श्वेता सिंग या दोघांना पोलिसांनी अटक केली होती. सध्या ते दोघेही पोलीस कोठडीत असून त्यांची पोलिसांकडून कसून चौकशी सुरु आहे.
बुली बाई अॅपच्या माध्यमातून मुस्लिम समुदायातील महिलांचे आक्षेपार्ह फोटो सोशल मीडियावर अपलोड करुन त्यांची बोली लावली जात होती. हा प्रकार उघडकीस येताच दिल्ली आणि मुंबई सायबर सेल पोलिसांत दोन गुन्ह्यांची उकल केल्यानंतर पोलीस आयुक्त हेमंत नगराळे यांनी बुधवारी पत्रकार परिषदेत तपासाचा तपशील दिला.
हे संपूर्ण प्रकरण एका गंभीर कटाचा भाग असून आम्ही सर्व बाजूंनी तपास करत आहोत, असे सांगून नगराळे म्हणाले, तपासात काही आक्षेपार्ह मेल सापडले आहेत. बुली बाई अॅप तयार करण्यासाठी आरोपींनी गीटहब या प्लॅटफॉर्मचा वापर केला होता. शीख धर्मियांशी संबंधित शब्दांचा वापर करुन मुस्लिम महिलांना या अॅपद्वारे टार्गेट केले जात असल्याचे तपासात उघडकीस आले आहे.
दोन दिवसांपूर्वी बंगलोर येथून विशाल झा तर उत्तराखंड येथून श्वेता सिंगला अटक केल्यानंतर आता इंजिनीअर असलेल्या मयांक रावत याला सायबर पोलिसांनी अटक केली आहे. विशाल आणि श्वेता हे दोघेही सध्या पोलीस कोठडीत आहेत तर मयांकचे ट्रान्झिट रिमांड घेण्यात आले असून त्याला पुढील चौकशीसाठी मुंबईत आणले जाईल.
बुली बाई ट्विटर हॅण्डलवर कोण फॉलोअर्स आहे याची माहिती काढली जात आहे. बुली बाई अॅप्सला ट्विटरवर फॉलो करणार्या हरपाल/सीख खालसा, सेज/सेज, खालसा सुपरमसीव आणि जतिंदर सिंग गुल्लर या फॉलोअरची माहिती पोलिसांना मिळाली आहे.
श्वेता ही क्रिएटर असून तिनेच ट्विटरवर बुली बाई नावाचे अॅप हॅन्डल तयार केलेे. हेे अॅप नेमके कोणी आणि केव्हा तयार केले याची चौकशी विशाल आणि मयांककडे सुरू आहे.
विशालचे यू ट्यूब चॅनल
विशालचे स्वत:चे यू ट्यूब चॅनल आहे. तो सध्या इंजिनिअरच्या दुसर्या वर्षांत शिकतो. शिक्षण घेत असताना त्याने स्वत:चे चॅनल्स सुरु केले होते. ते चॅनल्स कधीपासून सुरु होते, त्याने त्या चॅनल्सवर कोणता मजकूर अपलोड केला होता, त्यासाठी त्याला काही पैसे मिळाले का, पैसे मिळाले तर त्याला ते पैसे कोणी आणि किती दिले होते याचाही तपास सुरू आहे. आरोपीकडून जप्त केलेले मोबाईल, सिमकार्ड आणि लॅपटॉप फॉरेन्सिक लॅबमध्ये पाठविण्यात आले आहेत. विशाल हा मोबाईलवरुन त्याचा मजकूर अपलोड करीत होता.