नवी दिल्ली : धूम्रपान करणार्या व्यक्तींनाच नव्हे तर त्यांच्या सहवासात राहणार्या लोकांच्याही आरोग्याला धोका असतो. सहवासातील अशा 'पॅसिव्ह स्मोकिंग' म्हणजेच 'अप्रत्यक्ष धूम्रपान' करणार्या लोकांनाही फुफ्फुसाच्या कर्करोगाचा धोका संभवतो. आता एका नव्या संशोधनातून असे दिसून आले आहे की धूम्रपानाच्या धुरामुळे त्वचेसंबंधी खरुज आणि सोरायसिस यासारखे आजार होण्याचाही धोका अधिक असतो.
तंबाखूच्या धुरातून निघणारा कचरा आजूबाजूच्या पृष्ठभागावर आणि धुळीवर चिकटून राहतो असे दिसून आले आहे. हे घरातील पृष्ठभागावर अनिश्चित काळासाठी राहू शकते. धूम्रपान करणारे आणि धूम्रपान न करणारे असे दोघेही संभाव्य हानिकारक पदार्थांच्या संपर्कात येऊ शकतात. 'द लान्सेट फॅमिली अँड जर्नल्स'च्या 'ई-बायोमेडिसिनमध्ये प्रकाशित झालेल्या या अभ्यासानुसार, धुरामुळे होणार्या प्रदूषणाने मानवांमध्ये त्वचेच्या आजारांचा धोका वाढतो.
या संशोधनाशी संबंधित शेन साकामाकी चिंग यांनी सांगितले की धूम्रपान करणार्या व्यक्तीचा धूर मानवी त्वचेच्या संपर्कात येतो आणि त्यामुळे खरुज व सोरायसिसचा धोका वाढतो. या संशोधनात 22 ते 45 वर्षे वयोगटातील दहाजणांचा समावेश होता. त्यापैकी कुणीही धूम्रपान करीत नाही आणि पूर्णपणे निरोगी होते.
तीन तासांसाठी, प्रत्येक व्यक्तीला ट्रेडमिलवर 15 मिनिटे धूम्रपानामुळे होणारे प्रदूषण असलेला शर्ट घालून चालण्यास सांगितले. हे प्रदूषण घामाद्वारे शरीरात लवकर प्रवेश करते. त्यानंतर सहभागींचे रक्त व लघवीचे नमुने घेण्यात आले. तसेच त्यांच्या शरीरातील प्रथिनांसह इतर घटकांमधील बदलांची तपासणी करण्यात आली. शास्त्रज्ञांना असे आढळले की धुराच्या प्रदूषणामुळे लोकांच्या डीएनए, लिपिडस् आणि प्रथिनांचे नुकसान होते. हे सिगारेट ओढणार्या लोकांना होणार्या नुकसानीसारखेच आहे. त्वचा हा आपल्या शरीरातील सर्वात मोठा अवयव असल्याने प्रदूषणामुळे त्याची हानी होते.