मुंबई; पुढारी वृत्तसेवा : राज्यातील दूध उत्पादक शेतकर्यांच्या दुधाला किमान आधारभूत किंमत लागू करण्याबाबत मंत्रिमंडळ उपसमिती स्थापन करून याबाबत निर्णय घेणार असल्याची माहिती पशुसंवर्धन व दुग्धविकासमंत्री सुनील केदार यांनी विधान परिषदेत दिली.
राज्यातील दूध उत्पादक शेतकर्यांच्या दुधाला किमान आधारभूत किंमत (एफआरपी) देण्याच्या द़ृष्टीने काय कार्यवाही केली, याबाबत
सदस्य सदाशिव खोत यांनी प्रश्न विचारला होता.
याला उत्तर देताना केदार म्हणाले, राज्यातील दूध उत्पादक शेतकर्यांना दुधाचा रास्तभाव देण्याबाबत विविध संघटना तसेच लोकप्रतिनिधींकडून मागणी होत आहे. उसाप्रमाणेच दुधालाही किमान आधारभूत किंमत देण्याबाबत कायद्यातील तरतुदी तपासल्या जातील. तसेच किमान आधारभूत किंमत लागू करण्याबाबत व्यवहार्यता तपासण्यासाठी मंत्रिमंडळाची उपसमिती स्थापन करण्याची कार्यवाही सुरू आहे. लवकरच दुधाला किमान आधारभूत किंमत लागू करण्याबाबत निर्णय घेण्यात येईल.