कोल्हापूर, पुढारी वृत्तसेवा : प्रतिबंधित व्हेल माशाच्या उलटीची (अंबरग्रीस) तस्करी करणार्या टोळीच्या म्होरक्यासह तिघांना अटक करण्यात आली. त्यांच्याकडून 3 कोटी 41 लाख 30 हजार रुपये किमतीच्या उलटीसह साडेतीन कोटींचा मुद्देमाल जप्त करण्यात आला. स्थानिक गुन्हे अन्वेषण पथकाने सरनोबतवाडी येथील महामार्गावर सापळा रचून शुक्रवारी सकाळी ही कारवाई केली.
टोळीचा म्होरक्या प्रदीप शाम भालेराव (वय 36, रा. मावळ रोड, चेंबूर, मुंबई), शकील मोईन शेख (34, माणिकनगर, येरवडा, पुणे), अमीर हाजू पठाण (32, विश्रांतवाडी, भैरवनगर पुणे), अशी अटक केलेल्यांची नावे आहेत. टोळीत आणखी दोघांचा समावेश असावा, अशी शक्यता आहे. त्यांचाही छडा लावून लवकरच अटक करण्यात येईल, असे पोलिस निरीक्षक संजय गोर्ले यांनी सांगितले.
संशयितांकडून 3 किलो 413 ग्रॅम वजनाची व्हेल माशाची उलटी, आलिशान कार, मोबाईल जप्त केला आहे. शिवाय, जप्त करण्यात आलेल्या उलटीशिवाय आणखी काही प्रमाणात अशी उलटी संशयितांनी कोल्हापुरात आणली असावी, असा पोलिसांना संशय आहे. त्याद़ृष्टीने सखोल चौकशी करण्यात येत असल्याचे ते म्हणाले.
मुंबई, पुण्यातील तस्करी टोळीतील काही संशयित व्हेल माशाच्या उलटीची कोल्हापूरसह परिसरात तस्करी करीत असल्याची दबक्या आवाजात चर्चा होती. पोलिस अधीक्षक शैलेश बलकवडे यांनी 'एलसीबी'चे निरीक्षक गोर्ले यांना कारवाईच्या सूचना दिल्या. उपनिरीक्षक विनायक सपाटे, शेष मोरे यांच्या पथकाने वन खात्यातील अधिकार्यांचे सहाय्य घेऊन सरनोबतवाडीजवळ सापळा रचला. आलिशान कार रोखून झडती घेतली तेव्हा ही उलटी आढळली.
याप्रकरणी गांधीनगर पोलिसांत गुन्हा दाखल करण्यात आला आहे. कारवाईत वैभव पाटील, श्रीकांत मोहिते, अनिल पास्ते, दीपक घोरपडे आदींनी भाग घेतला.