मल्कानगिरी (ओडिशा) : तुम्ही बाजारात 100, 200 किंवा अगदी 1,000 रुपये किलोचे आंबे पाहिले असतील. पण एका किलो आंब्याची किंमत चक्क 3 लाख रुपये असू शकते यावर तुमचा विश्वास बसेल का? हे ऐकायला जरी अद्भुत वाटत असले तरी ते पूर्णपणे सत्य आहे. ओडिशामधील मल्कानगिरी जिल्ह्यातील तामसा या छोट्याशा गावातील शेतकरी देवा पादियामी यांच्या शेतात जगातील सर्वात महागडा मानला जाणारा मियाझाकी आंबा पिकला आहे. आंतरराष्ट्रीय बाजारात या आंब्याची किंमत सुमारे 3 लाख रुपये प्रति किलो इतकी आहे!
मियाझाकी ही आंब्याची एक अत्यंत दुर्मीळ आणि खास जपानी जात आहे. जपानमध्ये याला ‘ताइयो नो तामागो’ म्हणजेच ‘सूरज का अंडा’ म्हटले जाते. हा आंबा सामान्य आंब्यासारखा पिवळा किंवा हिरवा नसून, गडद लाल-जांभळ्या रंगाचा असतो. अत्यंत गोड चव, मखमली टेक्सचर आणि मुबलक अँटी-ऑक्सिडंट गुणांमुळे हा जगातील सर्वात महागडा आंबा मानला जातो. जपानमध्ये या आंब्यांचा मोठा लिलाव केला जातो आणि लोक तो एकमेकांना महागडी भेटवस्तू म्हणून देतात.
4 वर्षांची मेहनत आणि अनपेक्षित लॉटरी!
शेतकरी देवा पादियामी यांना 4 वर्षांपूर्वी एका सामाजिक कार्यकर्त्याकडून या आंब्याचे एक लहानसे रोप मिळाले होते. ओडिशामधील कडक हवामान आणि कठीण परिस्थितीचा सामना करत देवा यांनी या रोपाची पोटच्या पोरासारखी काळजी घेतली. आता 4 वर्षांनंतर या झाडाला आकर्षक लाल-जांभळ्या रंगाचे आंबे लागले असून, ते पाहण्यासाठी दूरदूरवरून लोकांची गर्दी होत आहे. या मौल्यवान आंबा पिकाने देवा यांची रात्रीची झोप उडवली आहे. लाखो रुपयांचे हे आंबे रात्रीच्या अंधारात कोणी चोरून नेऊ नये, म्हणून देवा यांच्याकडे कोणतीही आधुनिक सुरक्षा यंत्रणा किंवा बाउन्सर नाहीत. त्यामुळे ते स्वतः हातात लाठी घेऊन रात्रभर झाडाखाली झोपतात आणि आपल्या पिकाचे रक्षण करत आहेत. या आंब्याला योग्य बाजारपेठ मिळवून देण्यासाठी आता सरकारी पातळीवरून मदतीची गरज व्यक्त केली जात आहे.