क्वालालंपूर : जपानमध्ये हॉटेलात परवानाधारक शेफच पफर फिशची डिश बनवत असतात. त्यांनी या जहाल विषारी माशातील धोकादायक घटक काढून तो शिजवण्याचे प्रशिक्षण घेतलेले असते. मात्र, असा मासा सर्वसामान्य माणसाने अज्ञानाने घेणे व खाणे जीवावर बेतू शकते. तसा प्रकार मलेशियात घडला आहे. तिथे हा मासा खाऊन एका महिलेचा तडफडून मृत्यू झाल्याची धक्कादायक घटना समोर आली आहे. महिलेचा पती कोमात असून त्यांच्यावर उपचार सुरू आहेत.
मृत महिलेने एका स्थानिक मच्छिवाल्याकडून हे मासे विकत घेतले. घरी आल्यानंतर ते स्वच्छ करून शिजवले, पण खाल्ल्यानंतर अवघ्या काही क्षणात महिलेला अस्वस्थ वाटू लागले आणि काही सेकंदाताच तिचा तडफडून मृत्यू झाला. महिलेचा पतीने जेवणात ते मासे खाल्ले होते, त्यांची प्रकृतीही नाजूक आहे. त्यांची मुलगी घरी आल्यानंतर हा सर्व प्रकार उघडकीस आला. हे मासे चविष्ट असले तरी ते प्रचंड विषारी असतात. ते साफ करताना त्या महिलेने विषारी पदार्थ काढला नव्हता.
अन्न आणि औषध प्रशासनाने दिलेल्या माहितीनुसार पफर फिशमध्ये अत्यंत विषारी अशा टॉक्सिन टेट्रोडोटॉक्सिन आणि सैक्सिटॉक्सिन असते. पफर मासे गरम पाण्यात शिजवल्यामुळे किंवा फ्रिजमध्ये ठेवल्यानंतरही त्यातील टॉक्सिन नष्ट होत नाही. जपानमध्ये या माशांना मोठी मागणी असते, पण ते प्रशिक्षित शेफकडूनच बनवले जातात. या माशांमध्ये जे घातक विष असते ते सायनाईडपेक्षा 1200 पटीने अधिक विषारी असते. हे मासे जपान, चीन, दक्षिण आफ्रिका, फिलिपाईन्स आणि मेक्सिको या देशांमध्ये जास्त आढळतात. पफर मासे ब्लोफिश नावानेही ओळखले जाते. हे मासे गोल चेंडू सारखे फुगतात. त्यांच्या त्वचेवर काट्यांचे आवरण असते.