नवी दिल्ली ः ड्रायफ्रूट म्हणजेच सुका मेवा शरीराच्या प्रत्येक भागावर वेगवेगळ्या प्रकारे परिणाम करतात. शरीराच्या कोणत्या भागासाठी कोणते ड्रायफ्रूट फायदेशीर ठरू शकते ते जाणून घेऊया.
अक्रोड मेंदूसाठी अतिशय फायदेशीर ड्रायफ्रूट आहे. यामध्ये असलेले ओमेगा-3 फॅटी अॅसिड मेंदूसाठी लाभदायक आहे, जे स्मरणशक्ती आणि विचार करण्याची क्षमता सुधारण्यासाठी मदत करते. बदाम सगळेच खातात; पण आपल्या शरीराच्या कोणत्या भागाला बदाम खूप फायदेशीर ठरतो हे तुम्हाला माहीत आहे का? बदाम खाणे हृदयासाठी लाभदायक आहे. जर तुम्हाला नेहमी सांधे किंवा हाडांमध्ये दुखत असेल, तर तुम्ही आवर्जून अंजीर खावे. अंजीरमध्ये कॅल्शियम आणि पोटॅशियम मुबलक प्रमाणात आढळते, जे आपल्या शरीरासाठी फायदेशीर ठरेल. भिजवलेले मनुके खाल्ल्याने आपल्या शरीरातील रक्त निश्चितच वाढते; पण हे ड्रायफ्रूट आपल्या डोळ्यांसाठीही खूप फायदेशीर आहे. हे वयाशी संबंधित डोळ्यांच्या समस्या कमी करण्यासदेखील मदत करू शकते.