न्यूयॉर्क : रात्रीच्या वेळी सूर्यप्रकाश मिळू शकतो का? तर याचं उत्तर आता ‘हो’ असं असणार आहे. कारण, एका कंपनीने जगभरात रात्रीच्या वेळी सूर्यप्रकाश पोहोचवण्याचा व्यवसाय सुरू केला आहे. ही कंपनी आपल्या ग्राहकांच्या इच्छित ठिकाणी रात्रीच्या वेळी सूर्यप्रकाश पोहोचवेल. जाणून घेऊयात ही कंपनी नेमकी कोणती आहे? त्यांचा उद्देश काय आहे आणि या कृत्रिम सूर्यप्रकाशाची किंमत नेमकी किती असेल...
एका अमेरिकन कंपनीने जगभरात रात्रीच्या वेळी सूर्यप्रकाश पोहोचवण्याचा हा व्यवसाय सुरू केला आहे. ही कंपनी आपल्या ग्राहकांच्या इच्छित ठिकाणी रात्रीच्या वेळी सूर्यप्रकाश पोहोचवेल, ज्याचा दर सुद्धा सांगण्यात आला आहे. हे ऐकून कदाचित विनोद वाटेल; पण कॅलिफोर्नियास्थित स्टार्टअप ‘रिफ्लेक्ट ऑर्बिटल’ 2024 पासून यावर काम करत आहे. ब्लूमबर्गच्या एका रिपोर्टनुसार, कंपनीने नुकतेच जाहीर केले आहे की, रात्री एका तासासाठी प्रकाश पोहोचवण्यासाठी ग्राहकांना किती पैसे द्यावे लागतील. रिफ्लेक्ट ऑर्बिटल पृथ्वीच्या निम्न कक्षेत मोठे परावर्तक आरसे असलेले उपग्रह तैनात करण्याची योजना आखत आहे. हे आरसे सूर्यप्रकाश पकडतील आणि तो पृथ्वीच्या निवडक भागांवर निर्देशित करतील.
सुरुवातीच्या प्रोटोटाईपमध्ये अंदाजे 60 फूट रुंदीचा आरसा असेल, जो सुमारे 3 मैल रुंदीचा परिसर प्रकाशित करण्यास सक्षम असेल. जमिनीवरून पाहिल्यास, हा प्रकाश पौर्णिमेच्या चंद्रासारखा दिसेल. कंपनी ही सेवा व्यावसायिक मॉडेल म्हणून देण्याची योजना आखत आहे. अहवालानुसार, यासाठी प्रति तास सुमारे 5000 डॉलर्स किंवा अंदाजे 4.6 लाख रुपये खर्च येईल. ही सेवा अशा ग्राहकांना उपलब्ध होईल जे वार्षिक किमान 1000 तासांसाठी करार करतील. याचा सरळ अर्थ असा आहे की, हे तंत्रज्ञान मोठे उद्योग आणि संस्थांना डोळ्यासमोर ठेवून विकसित केले जात आहे.
भविष्यात ऊर्जेचे नवीन पर्याय उपलब्ध करून देणारी आणि जीवाश्म इंधनावरील अवलंबित्व कमी करणारी प्रणाली विकसित करण्याचे कंपनीचे उद्दिष्ट आहे. जर पहिला प्रयोग यशस्वी झाला, तर कंपनी येत्या काही वर्षांत हजारो उपग्रह प्रक्षेपित करू शकेल. रिफ्लेक्ट ऑर्बिटलच्या महत्त्वाकांक्षी योजना आहेत. कंपनीचा 2028 पर्यंत अंदाजे 1000 आणि 2030 पर्यंत 5000 उपग्रह तैनात करण्याचा मानस आहे. भविष्यात ही संख्या 50,000 पर्यंत वाढवण्याचे उद्दिष्ट आहे. मोठे आरसे 180 फूट व्यासापर्यंत असू शकतात, जे अनेक पटींनी अधिक प्रकाश देण्यास सक्षम आहेत.