न्यूयॉर्क : मंगळवार, दि. 21 जानेवारीला आकाशाच्या पटलावर ग्रहांचा एक सुंदर खेळ रंगणार आहे. यावेळी रात्रीच्या आसमंतात सहा ग्रह एखादी परेड केल्यासारखे एका रेषेत दिसून येतील. मंगळ, गुरू, युरेनस, नेपच्यून, शुक्र आणि शनी असे सहा ग्रह यावेळी विशिष्ट स्थितीत दिसतील. हे द़ृश्य सूर्यास्तानंतर पाहता येईल, असे संशोधकांनी म्हटले आहे.
या सहा ग्रहांपैकी चार ग्रह दुर्बिणीशिवायच स्पष्टपणे दिसतील. त्यामध्ये मंगळ, गुरू, शुक्र आणि शनी यांचा समावेश आहे; मात्र नेपच्यून व युरेनस यासारख्या दूरस्थ ग्रहांना स्पष्टपणे पाहण्यासाठी दुर्बिणीची गरज भासू शकते. लालसर मंगळ ग्रह पूर्वेकडे मिथुन राशीत द़ृग्गोचर होईल. चमकदार गुरू ग्रह त्याच्यापेक्षा थोड्या अधिक उंचीवर वृषभ राशीत दिसेल. युरेनस हा ग्रह त्याच्या कडेला मेष राशीत दिसून येईल. पुढील तीन ग्रह पश्चिमेच्या जवळ दिसून येतील. नेपच्यून मीन राशीत असेल; पण तो पाहण्यासाठी दुर्बिणीची गरज भासू शकते. पिवळसर शनी व तेजस्वी शुक्र सहजपणे दिसून येतील. ते कुंभ राशीत दिसतील. ज्यावेळी ग्रहमालिकेतील अनेक ग्रह सूर्याच्या एका बाजूला जवळजवळ येतात, त्यावेळी अशी ‘प्लॅनेटरी अलायन्मेंट’ दिसते. पृथ्वीवरून आकाशाच्या एका छोट्या भागात असे अनेक ग्रह या स्थितीमुळे दिसू शकतात. हे ग्रह आकाशात एक रेषा तयार करतात; पण अर्थातच ती सरळ रेषा नसते.