सान हुआन (पुर्तो रिको) : विमान उड्डाणांच्या इतिहासात सुरक्षेचे नियम मुळापासून बदलणाऱ्या एका ऐतिहासिक अपघाताच्या अवशेषांचा शोध अखेर ७४ वर्षांनंतर लागला आहे. १९५२ मध्ये पुर्तो रिकोच्या किनाऱ्याजवळ समुद्रात कोसळलेल्या ‘पॅन अम’ कंपनीच्या ‘डीसी-४’ विमानाचे अवशेष समुद्रात तब्बल २,००० फूट (सुमारे ६०० मीटर) खोल तळाशी सापडले आहेत.
‘एयर/सी हेरिटेज फाऊंडेशन’चे अध्यक्ष रस मॅथ्यूज, ‘दीप सी व्हिजन’चे मुख्य कार्यकारी अधिकारी टोनी रोमिओ आणि डिस्कव्हरी चॅनलच्या पथकाने संयुक्तपणे ही मोहीम राबवली. उच्च क्षमतेचे ‘सोनार’ स्कॅनर असलेल्या अत्याधुनिक अंडरवॉटर ड्रोनच्या मदतीने विमानाचा मुख्य भाग आणि त्यापासून वेगळी झालेली शेपूट शोधण्यात यश आले.
पुराभिलेख, हवामानाचा जुना डेटा आणि तत्कालीन हवाई दलाच्या वैमानिकांनी तयार केलेल्या नकाशांचे संश्लेषण करून १० चौरस सागरी मैलांचे क्षेत्र निश्चित करण्यात आले होते. ड्रोनने आपल्या पहिल्याच फेरीत या विमानाचे अवशेष कॅमेऱ्यात टिपले.
१९५२ च्या या दुर्दैवी अपघातात ५२ प्रवाशांचा मृत्यू झाला होता, तर १७ जण सुदैवाने वाचले होते. विमानाचे इंजिन बंद पडल्यामुळे ते समुद्रात आणीबाणीच्या प्रसंगात उतरवावे लागले होते. विमान पाण्यात उतरल्यानंतर प्रवाशांना लाईफ जॅकेट शोधताना आणि कर्मचाऱ्यांना लाईफ राफ्ट (बचाव नौका) बाहेर काढताना प्रचंड अडचणी आल्या होत्या.