लंडन : हिमयुगातील सर्वात धोकादायक आणि शिकारी प्राण्यांपैकी एक असलेल्या ‘सॅबर-टूथ’ वाघाची एक अत्यंत दुर्मीळ कवटी लंडनमध्ये लिलावासाठी सज्ज झाली आहे. ही कवटी ‘स्मिलोडन फेटालिस’ या नामशेष झालेल्या प्रजातीची आहे. ख्रिस्तीज या जगप्रसिद्ध लिलाव गृहात मंगळवारी (३० जून २०२६) होणाऱ्या लिलावात या कवटीला तब्बल १५ लाख पाऊंड (सुमारे १५ कोटी रुपये) इतकी मोठी किंमत मिळण्याची शक्यता वर्तवली जात आहे.
७ इंचांचे प्राणघातक सुळे
या महाकाय वाघाची कवटी २००८ मध्ये अमेरिकेच्या फ्लोरिडा येथील एका सिंकहोलमध्ये सापडली होती. ही कवटी साधारण ११,००० ते ७०,००० वर्षे जुनी असल्याचे संशोधकांचे म्हणणे आहे. या जीवाश्माचे सर्वात मोठे वैशिष्ट्य म्हणजे याचे जवळपास ७ इंच लांब असलेले अणकुचीदार सुळे आहेत. संशोधकांच्या मते, हे प्राणी त्यांचे जबडे १२० अंशांपर्यंत उघडू शकत असत, ज्यामुळे ते शिकार केलेल्या प्राण्याच्या गळ्यावर प्राणघातक वार करत असत.
वयाच्या तिसऱ्या वर्षांनंतर यायचे सुळे
या शोधासोबतच शास्त्रज्ञांनी एक रंजक माहिती समोर आणली आहे. या प्राण्यांना त्यांचे मुख्य अणकुचीदार सुळे वयाच्या तिसऱ्या वर्षांनंतर येत असत. सुरुवातीला त्यांचे दात लहान असायचे; मात्र वयाच्या १४ ते २२ महिन्यांनंतर त्यांचे दात इतर आधुनिक मांजरींच्या प्रजातींपेक्षा दुप्पट वेगाने वाढू लागायचे. हे हिंस्र प्राणी सुमारे १०,००० वर्षांपूर्वी हिमयुगाच्या शेवटी नामशेष झाले.