आजच्या डिजिटल युगात स्मार्टवॉच हे केवळ वेळ पाहण्याचे साधन राहिले नसून, ते लोकांच्या आरोग्य आणि फिटनेसवर लक्ष ठेवण्याचे एक लोकप्रिय माध्यम बनले आहे. बाजारात उपलब्ध असलेल्या बहुतांश स्मार्टवॉच हृदयाचे ठोके (हार्ट रेट), पावलांची संख्या (स्टेप्स), झोपेचा पॅटर्न, जळलेल्या कॅलरीज आणि ऑक्सिजनची पातळी यांसारख्या अनेक गोष्टी ट्रॅक करण्याचा दावा करतात. आज आपण जाणून घेणार आहोत की स्मार्टवॉच नक्की कसे काम करते...
हार्ट रेट मॉनिटरिंग (हृदयाच्या ठोक्यांची तपासणी) :
स्मार्टवॉचमधील ऑप्टिकल सेन्सर्स तुमच्या मनगटातील रक्तप्रवाहातील होणारे बदल मोजून हृदयाच्या ठोक्यांचा अंदाज लावतात. यामुळे तुम्ही विश्रांतीच्या स्थितीत असताना आणि व्यायामादरम्यान तुमचे हृदय किती वेगाने धडधडत आहे, हे कळू शकते.
किती पावले चालला :
बहुतेक स्मार्टवॉचमध्ये अॅक्सिलेरोमीटर आणि गायरोस्कोप सेन्सर्स असतात, जे तुमच्या चालण्या-फिरण्याच्या हालचालींची नोंद ठेवतात. यावरून दिवसातील एकूण पावले, कापलेले अंतर आणि अॅक्टिव्हिटी लेव्हलचा अंदाज लावला जातो.
झोपेचे निरीक्षण (स्लीप ट्रॅकिंग) :
स्मार्टवॉच तुमच्या झोपेचा कालावधी आणि पॅटर्न ट्रॅक करण्याचा दावा करते. तुम्ही किती वेळ झोपलात, रात्री किती वेळा जागे झालात आणि तुमची झोप किती गाढ होती, हे ते सांगू शकते.
रक्तातील ऑक्सिजनची पातळी :
काही अॅडव्हान्स स्मार्टवॉच SpO2 सेन्सरद्वारे रक्तातील ऑक्सिजनचा अंदाज लावतात. तथापि, ही आकडेवारी वैद्यकीय उपकरणांइतकी अचूक मानली जात नाही.
तणाव आणि स्ट्रेस मॉनिटरिंग :
अनेक स्मार्टवॉच ‘हार्ट रेट व्हेरिएबिलिटी’ (HRV) सारख्या संकेतांच्या आधारे मानसिक तणावाचा अंदाज लावतात आणि युजरला रिलॅक्सेशन अथवा श्वासोच्छ्वासाच्या व्यायामाचा सल्ला देतात.
स्मार्टवॉच वापरण्याचे फायदे...
सक्रिय राहण्याची प्रेरणा : स्मार्टवॉच लोकांना जास्त चालण्यासाठी, व्यायाम करण्यासाठी आणि आपल्या दैनंदिन हालचालींकडे लक्ष देण्यासाठी प्रेरित करते.
निरोगी सवयींचा विकास : पावलांची संख्या, पाणी पिण्याचे रिमाइंडर्स आणि वर्कआऊट ट्रॅकिंगमुळे रोजच्या आयुष्यात चांगल्या आणि निरोगी सवयी अंगीकारण्यास मदत होते.
आरोग्यविषयक पूर्वसूचना : काही प्रगत स्मार्टवॉच हृदयाच्या अनियमित गतीसारख्या समस्यांचे संकेत ओळखण्यास मदत करू शकतात.
झोपेत सुधारणा : झोपेचा पॅटर्न पाहून लोक आपल्या झोपण्याच्या सवयींमध्ये आवश्यक तो बदल आणि सुधारणा करू शकतात.