वॉशिंग्टन : गूगलने जेमिनी रोबोटिक्स आणि जेमिनी रोबोटिक्स ईआर असे दोन खास एआय मॉडेल लाँच केले आहेत. याआधीच्या सर्व रोबोंपेक्षा या रोबोंना मनुष्यासारखी अधिक समज असेल आणि ते योग्य प्रतिसादही देऊ शकतील, असा गूगलचा दावा आहे. एआयला भौतिक जगात उपयोगी आणि सहायक बनवण्यासाठी त्यात ‘एम्बोडिड रिझनिंग’ म्हणजेच मनुष्यासारखी समज आणि प्रतिसाद देण्याची क्षमता असावी लागेल, ज्यामुळे तो सुरक्षितपणे कार्य करू शकेल, त्या द़ृष्टीने आम्ही प्रयत्न केले आहेत, असे गुगलने या एआय मॉडेल लाँचिंगच्या वेळी म्हटले.
गूगलने यापूर्वी 2023 मध्ये आपले पहिले एआय मॉडेल जेमिनी लाँच केले होते. त्यानंतर कंपनी त्यांचे मॉडेल्स अधिक प्रगत, आधुनिक कसे असतील, यावर भर देत आली आहे. तर्कशक्तीपासून इमेज जनरेशनपर्यंत, गुगलचे जेमिनी अनेक क्षमतांनी सुसज्ज आहे. आता कंपनीने आपल्या नवीन एआय मॉडेल्सची घोषणा केली आहे, जे रोबोटस्ला मनुष्यासारखे काम करण्यास सक्षम करतील. हे मॉडेल्स म्हणजे जेमिनी रोबोटिक्स आणि जेमिनी रोबोटिक्स ईआर.
गूगलच्या मते, जेमिनी रोबोटिक्स एक ‘व्हिजन लँग्वेज अॅक्शन (व्हीएलए) मॉडेल‘ आहे, जे जेमिनी 2.0 च्या आधारावर तयार केले गेले आहे. यात भौतिक क्रिया (फिजीकल अॅक्शन्स) करण्याची एक नवीन क्षमता जोडली गेली आहे, ज्यामुळे हे रोबोटस्ना थेट नियंत्रित करू शकते. या मॉडेलमध्ये जनरलिटी, इंटरअॅक्टिव्हिटी व डेक्स्टेरिटी अशा तीन महत्त्वाच्या वैशिष्ट्यांचा समावेश आहे. हे मॉडेल मनुष्याची भाषा अधिक चांगल्या प्रकारे समजून त्यानुसार प्रतिसाद देते. याशिवाय, हे सतत आपल्या पर्यावरणाचे निरीक्षण करत असते आणि कोणत्याही बदलावर तत्काळ प्रतिसाद देते. त्याची ही क्षमता त्याला घरे आणि कार्यस्थळे यांसारख्या विविध ठिकाणी उपयोगी बनवते.
गूगलने हेही सांगितलं की, कारण रोबोटस् विविध आकार आणि डिझाईनमध्ये येतात, जेमिनी रोबोटिक्स हे त्यानुसार विकसित केले गेले आहे. हे अॅलोहा (बाय आर्म रोबोटिक प्लॅटफॉर्म) वर प्रशिक्षित करण्यात आले आहे, हे फ्रँका आर्मससारख्या इतर रोबोटिक प्लॅटफॉर्म्स देखील नियंत्रित करू शकते. जेमिनी रोबोटिक्ससह, गूगलने जेमिनी रोबोटिक्स ईआर देखील सादर केले आहे. जेमिनी रोबोटिक्स ईआर जेमिनी 2.0 च्या क्षमतांना अधिक विस्तृत करते, ज्यामुळे त्यात थ—ीडी डिटेक्शन आणि पॉइंटिंगची क्षमता वाढते. हे मॉडेल जेमिनीच्या कोडिंग कौशलांना स्थानिक तर्कासोबत जोडून नवीन कार्य करण्याची क्षमता विकसित करते. उदाहरणार्थ, जर त्याला एक कॉफी मग दाखवला गेला, तर ते लगेच ठरवू शकते की त्याला हँडलने दोन बोटांनी पकडायचं आहे आणि तो कुठे न्यायचा आहे, तो मार्ग कोणता असेल, हे ठरवू शकते.