वॉशिंग्टन : जमिनीवर आपण अनेक विषारी व बिनविषारी साप पाहत असतो. त्यापैकी 'किंग कोब्रा' हा जगातील सर्वात मोठा विषारी सर्प आहे. मात्र, समुद्रातही अनेक जहाल विषारी साप असतात. ते क्वचितच किनार्यावर येत असतात. आता क्वीन्स सनशाईन कोस्टवर अशाच प्रकारचा एक खतरनाक आणि महाकाय विषारी साप आढळल्याने खळबळ उडाली आहे. या समुद्र किनार्यावर फिरायला गेलेल्या पर्यटकांना हा साप दिसला. सनशाईन कोस्ट स्नेक कॅचर्सने सांगितले की, हा साप जखमी झालेल्या अवस्थेत होता.
स्टीवर्ट मॅकेंजीने माध्यमांशी बोलताना सांगितले की, हा साप नक्कीच अस्वस्थ होता. त्या सापाच्या अंगावर मोठी जखम होती. कोणत्या तरी धारदार वस्तूने या सापाचा एक भाग कापला गेला असेल. सापाला वाचवणे शक्य आहे का, याबाबत माझा गोंधळ उडाला होता; पण मी त्या सापाला वन्य प्राण्यांच्या रुग्णालयात उपचारासाठी दाखल केलं. हा विशाल साप कमीत कमी 10 वर्षांचा असू शकतो. याचं वजन 2-4 किलो आणि 1 मीटरहून जास्त लांब आहे.
सनशाईन कोस्ट स्नेक कॅचर्स 24/7 ने सोशल मीडियावर पोस्ट शेअर केली आहे. समुद्र किनारी आढळणार्या सापांपासून दूर राहण्याचे आवाहन या पोस्टच्या माध्यमातून करण्यात आले आहे. पोस्ट शेअर करताना म्हटले आहे की, समुद्री सापांना उचलून त्यांना पुन्हा समुद्रात फेकण्याचा प्रयत्न करू नका. समुद्री साप खूप विषारी असतात आणि त्यांना सर्पमित्रच हाताळू शकतात. या पोस्टवर प्रतिक्रिया देताना यूजर्सने आश्चर्य व्यक्त करत प्रतिक्रिया दिल्या. एकाने म्हटले की, समुद्री साप एवढे मोठे असतात, मला माहीत नव्हतं!