कढीपत्त्याचे आरोग्यासाठीही होतात अनेक लाभ

नवी दिल्ली ः फोडणीत कढीपत्ता टाकला की भाजी किंवा आमटीला सुरेख सुवास व स्वाद मिळतो. त्यामुळे भारतीय स्वयंपाकघरात कढीपत्ता हा महत्त्वाचा घटक मानला जातो. चवीसाठी वापरला जाणारा हा पानांचा गुच्छ केवळ चवच वाढवत नाही, तर अनेक औषधी गुणधर्मांनी भरलेला असतो. दैनंदिन जीवनात कढीपत्त्याचे अनेक फायदे आहेत, जे आरोग्यासाठी उपयुक्त ठरतात, असे तज्ज्ञ सांगतात.

कढीपत्ता पचनसंस्था सुधारण्यास मदत करतो. अन्न पचवण्याची क्षमता वाढवतो आणि अपचन, गॅस किंवा आम्लता यांसारख्या समस्या कमी करतो. दररोज सकाळी रिकाम्या पोटी 5-6 कढीपत्त्यांची पाने चावून खाल्ल्यास पचनसंस्थेसाठी लाभदायक ठरते. कढीपत्त्यांचा केसांच्या आरोग्यावर सकारात्मक प्रभाव पडतो. त्यातील अँटिऑक्सिडंटस् आणि अमिनो अ‍ॅसिडस् केसांना पोषण देतात आणि केस गळती थांबवतात. कढीपत्त्यांचा रस नारळाच्या तेलात मिसळून केसांना लावल्यास केस दाट, चमकदार आणि मजबूत होतात. कढीपत्त्यात असलेल्या अँटिऑक्सिडंटस् आणि फायटोकेमिकल्समुळे हृदय निरोगी राहते.

कोलेस्ट्रॉल नियंत्रित राहते आणि हृदयविकाराचा धोका कमी होतो. कढीपत्ता रक्तातील साखर नियंत्रित ठेवण्यास मदत करतो. कढीपत्त्याचे नियमित सेवन केल्यास इन्सुलिनची कार्यक्षमता वाढते आणि मधुमेह असलेल्या लोकांना फायदा होतो. कढीपत्त्याचा उपयोग त्वचेवरील डाग आणि पिगमेंटेशन कमी करण्यासाठी केला जातो. त्यातील नैसर्गिक गुणधर्म त्वचेला तजेलदार आणि निरोगी ठेवतात. कढीपत्ता शरीरातील अतिरिक्त चरबी कमी करण्यास मदत करतो. यामुळे चयापचय दर सुधारतो आणि वजन संतुलित राहते. कढीपत्त्यात असलेली जीवनसत्त्वे, अँटिऑक्सिडंटस्मुळे शरीराची रोगप्रतिकारक शक्ती वाढते आणि संसर्गापासून बचाव होतो. दैनंदिन जीवनात कढीपत्त्याचा समावेश केल्यास शरीरालाअनेक आरोग्यदायी फायदे मिळतात.