वॉशिंग्टन ः ‘ओपन एआय’ कंपनीने आपल्या ‘अॅडव्हान्स्ड व्हॉईस मोड’साठी नवीन अपडेटस् जारी केले, जे चॅट जीपीटीमधील ‘एआय’ व्हॉईस फीचर अधिक सुसंवादशील आणि वापरकर्त्यांसाठी सोयीस्कर बनवतील. या अपडेटस्मुळे एआय सहाय्यक ( AI Assistant) वापरकर्त्यांना कमी अडथळा आणेल आणि संभाषण अधिक नैसर्गिक वाटेल.
‘ओपन एआय’च्या पोस्ट-ट्रेनिंग संशोधक मॅनुका स्ट्राटा यांनी सोमवारी कंपनीच्या अधिकृत सोशल मीडिया चॅनेलवर एक व्हिडीओ पोस्ट करत या सुधारणा जाहीर केल्या. ‘आमची टीम अॅडव्हान्स्ड व्हॉईस मोड’मध्ये काही रोमांचक सुधारणा करत आहे. आज आम्ही जे अपडेट सादर करत आहोत, त्यामध्ये एआयची संवादशैली अधिक चांगली आणि आकर्षक असेल. तो वापरकर्त्यांचे कमी वेळा व्यत्यय आणेल. नवीन मॉडेल अधिक नैसर्गिक, थेट आणि संक्षिप्त स्वरूपाचे असेल,’ असे स्ट्राटा यांनी स्पष्ट केले. या अद्ययावत आवृत्तीत, एआय व्हॉईस असिस्टंटने वापरकर्त्यांना सतत व्यत्यय आणण्याची समस्या दूर करण्यावर भर देण्यात आला आहे. विशेषतः, वापरकर्ता विचार करण्यासाठी थोडा वेळ घेत असल्यास किंवा श्वास घेत असताना, ‘एआय’ विनाकारण संभाषण तोडत असे. या नव्या सुधारणा त्या समस्येवर उपाय देतील आणि संवाद अधिक सुसंगत होईल.