बंगळूर :
भारतीय अवकाश संशोधन संस्था 'इस्रो'ने आता 'मार्स ऑर्बिटर मिशन-2' च्या पुढील योजनेची घोषणा केली आहे. त्यानुसार मंगळावर आणखी एक ऑर्बिटर पाठवले जाणार आहे. यापूर्वी भारताने 'मंगळयान-1' यशस्वीरीत्या मंगळावर पाठवले होते. एखाद्या अन्य ग्रहावर यान पाठवण्याची ही भारताची पहिलीच मोहीम होती. आता 'मंगळयान-2' ही मोहीम 'चांद्रयान-3' नंतर सुरू होईल, अशी माहिती 'इस्रो'चे प्रमुख के. सिवन यांनी दिली आहे.
'मंगळयान-2' हे रोव्हर असेल की मंगळाभोवती फिरणारे ऑर्बिटर असेल असे विचारले असता सिवन यांनी सांगितले की सध्या आम्ही ऑर्बिटर मोहिमेबाबतच विचार करीत आहोत. 'मंगळयान-2' ही केवळ ऑर्बिटर मिशनच असेल. 'मंगळयान-1' हे नोव्हेंबर 2013 मध्ये पाठवण्यात आले होते. ते सप्टेंबर 2014 मध्ये मंगळाच्या कक्षेत जाऊन पोहोचले होते. ते सहा महिने कार्यरत राहण्यासाठी बनवले होते; पण आता सातव्या वर्षातही ते सक्रिय आहे. तुलनेने अतिशय कमी खर्चात राबवलेली ही मोहीम आपल्या पहिल्याच प्रयत्नात यशस्वी ठरली होती. सध्या 'इस्रो' चांद्रयान-3 आणि 'गगनयान' या मोहिमांकडे अधिक लक्ष देत आहे. याच वर्षी डिसेंबरमध्ये 'गगनयान'ची मानवरहीत चाचणी होणार आहे. 'गगनयान' मोहिमेत चार भारतीय अंतराळवीर भारतातच बनवलेल्या अंतराळयानातून अंतराळप्रवास करतील. 'चांद्रयान-3' या वर्षीच्या पहिल्या सहामाहीत कधीही लाँच होऊ शकते. त्यामध्ये 'चांद्रयान-2' प्रमाणेच ऑर्बिटरसह एक लँडर आणि रोव्हरही असणार आहे.