नवी दिल्ली : रोजच्या आहारात सहज उपलब्ध होणारे बीट हे केवळ सॅलडपुरते मर्यादित नसून ते एक ‘सुपरफूड’ आहे.
यामध्ये मँगनीज, पोटॅशियम, लोह, फोलेट आणि व्हिटॅमिन A, B6, C यांसारखे आवश्यक पोषक घटक मुबलक प्रमाणात आढळतात. रक्तदाब नियंत्रण, त्वचेचे आरोग्य आणि प्रतिकारशक्ती वाढवण्यासाठी बीट अत्यंत फायदेशीर ठरते, असे तज्ज्ञ सांगतात.
सॅलडमध्ये लाल-गुलाबी रंगाची भर घालणारे बीट आपण अनेकदा खातो, पण या सामान्य दिसणार्या फळभाजीला ‘सुपरफूड’ का म्हटले जाते, हे तुम्हाला माहिती आहे का? आरोग्य तज्ज्ञांच्या मते, एक छोटेसे बीट शरीरातील 10 मोठ्या समस्यांवर मात करण्यास मदत करू शकते. बीट केवळ शरीरातील रक्त वाढवत नाही, तर आतड्यांची स्वच्छता करण्यापासून ते बुद्धी तल्लख करण्यापर्यंत आणि रक्तदाब नियंत्रणात ठेवण्यापर्यंत अनेक आरोग्यदायी फायदे देते. बीटमध्ये असलेले अँटिऑक्सिडंटस् आणि जीवनसत्त्वे त्वचेचे सूर्यकिरणांपासून संरक्षण करतात. यातील व्हिटॅमिन सी ‘कोलेजन’ निर्मितीस मदत करते, ज्यामुळे त्वचा चमकदार आणि मुलायम राहते.
शरीरात हिमोग्लोबिनची कमतरता असल्यास बीट हा एक सोपा आणि प्रभावी उपाय आहे. यामध्ये भरपूर प्रमाणात लोह असल्याने, ते रक्ताची कमतरता दूर करण्यास मदत करते. बीटमध्ये व्हिटॅमिन सी मुबलक प्रमाणात असते, जे शरीराची रोगांशी लढण्याची शक्ती, म्हणजेच प्रतिकारशक्ती मजबूत करते. बीटमधील नायट्रेटस् मेंदूपर्यंतचा रक्तप्रवाह सुधारतात, ज्यामुळे स्मरणशक्ती आणि एकाग्रता वाढते. तसेच, ‘बीटाईन’ नावाचा घटक मूड सुधारून नैराश्यापासून बचाव करण्यास मदत करतो. फायबरने परिपूर्ण असल्याने बीट पचनसंस्था सुधारते आणि पोट स्वच्छ ठेवण्यास मदत करते. बीटमध्ये ‘बेटानिन’ नावाचा घटक असतो, जो कर्करोगाशी लढण्यास मदत करतो.
यातील दाह-विरोधी गुणधर्म यकृतावरील सूज कमी करून त्याला निरोगी ठेवण्यास मदत करतात. गर्भवती महिलांसाठी बीट खूप फायदेशीर आहे. यामुळे केवळ अॅनिमिया टाळता येत नाही, तर गर्भातील बाळाच्या विकासालाही मदत होते. बीटमधील नायट्रेटस् शरीरात नायट्रिक ऑक्साईड वायू तयार करतात, ज्यामुळे रक्तवाहिन्या रुंद होतात आणि रक्तप्रवाह सुरळीत राहतो. यामुळे रक्तदाब नियंत्रणात राहून हृदयविकाराचा धोका कमी होतो. यामध्ये असलेले व्हिटॅमिन ए डोळ्यांची द़ृष्टी सुधारण्यास मदत करते.