वॉशिंग्टनः एखाद्या अॅक्वेरियममध्ये तुम्हाला एक सुंदर ‘ॲरोवाना’ मासा पोहताना दिसला आणि काही वेळाने तो खरा मासा नसून एक रोबो आहे हे समजले, तर बहुधा तुमचा विश्वास बसणार नाही. आंतरराष्ट्रीय व्यापार मेळाव्यात (CIFTIS) एका अशाच अनोख्या तंत्रज्ञानाचे प्रदर्शन करण्यात आले, ज्याने सर्वांचे लक्ष वेधून घेतले आहे.
पहिल्याच नजरेत पाण्यात पोहणारा हा मासा अगदी खरा वाटतो; पण प्रत्यक्षात हा एक हाय-टेक बायोनिक ॲरोवाना रोबो (Bionic Arowana Robot) आहे. खऱ्या ॲरोवाना माशाची शारीरिक रचना आणि त्याच्या पोहण्याची नैसर्गिक शैली लक्षात घेऊन याची निर्मिती करण्यात आली आहे. विशेष म्हणजे, पाण्यातील याच्या शरीराची हालचाल इतकी नैसर्गिक दिसते की, दुरून पाहून याला खरा मासा समजणे साहजिकच आहे. या बायोनिक फिशचे सर्वात मोठे वैशिष्ट्य म्हणजे यातील ‘फ्लुईड सिम्युलेशन तंत्रज्ञान’. या तंत्रज्ञानाच्या मदतीने हा रोबो पाण्याखाली अत्यंत सहजतेने आणि सुंदर रीतीने पोहतो. त्याच्या पोहण्याची शैली आणि शारीरिक रचना इतकी अचूक आहे की, पहिल्याच नजरेत खरा ॲरोवाना मासा आणि या रोबोमधील फरक ओळखणे जवळजवळ अशक्य होते.
हा बायोनिक ॲरोवाना जास्त वेगाने पळण्यासाठी नाही, तर खऱ्या माशासारख्या नैसर्गिक पोहण्यासाठी डिझाईन केला गेला आहे. याचा कमाल वेग १.९ किलोमीटर प्रतितास (सुमारे १.१ ते १.२ मैल प्रतितास) आहे. म्हणजेच, वेगापेक्षा पाण्यातील त्याची नैसर्गिक आणि गुळगुळीत हालचाल हे याचे मुख्य वैशिष्ट्य आहे. बॅटरीबद्दल बोलायचे झाले, तर या रोबोमध्ये लिथियम बॅटरी देण्यात आली आहे. एकाच चार्जवर हा रोबो १२ तास सलग पाण्यात पोहू शकतो, असा दावा कंपनीकडून केला जात आहे. त्यामुळे अॅक्वेरियम किंवा पाण्याचा विशिष्ट सेटअप असलेल्या ठिकाणी याचा दीर्घकाळ वापर करता येऊ शकतो.
हेच वैशिष्ट्य याला सामान्य रिमोट-कंट्रोल रोबोपेक्षा वेगळे बनवते. हा रोबो स्वतःहूनही पोहू शकतो आणि रिमोटनेही नियंत्रित केला जाऊ शकतो. याला चालवण्यासाठी दरवेळी रिमोटची गरज पडत नाही. पाण्यात सोडल्यानंतर हा स्वतःच्या ठरवलेल्या वर्तुळात आपोआप पोहू शकतो. या रोबोची कमाल ऑपरेटिंग खोली २० मीटर (सुमारे ६६ फूट) सांगण्यात आली आहे. याचा अर्थ हा केवळ पाण्याच्या पृष्ठभागावर पोहण्यासाठी बनवलेला नाही, तर तो पाण्याच्या बऱ्याच खोलीपर्यंत सहज कार्य करू शकतो.