करमाळा : पुढारी वृत्तसेवा : जेऊर (ता. करमाळा) येथील जेऊर-टेंभुर्णी बायपास रोडवरील यादव कॉम्प्लेक्समध्ये शनिवारी मध्यरात्री पाच दुकाने फोडण्यात आली. यामध्ये लाखोंचा ऐवज लंपास करण्याचा आला. याबाबत करमाळा पोलिसांत अज्ञातावर गुन्हा दाखल करण्यात आला. या प्रकरणाची माहिती मिळताच करमाळा पोलिसांनी डॉग स्कॉड सह हातांचे ठसे घेणारे पथक पाचारण केले होते. परंतु रात्री उशिरापर्यंत काहीच धागेदोरे हाती लागले नाहीत. आतापर्यंत केवळ दोन दुकानांतील एक लाख पाच हजारांचा मुद्देमाल गेल्याचे नोंद करण्यात आली आहे. इतर चोरीचा तपास अद्याप सुरू आहे.
यादव कॉम्प्लेक्समध्ये राहुल यादव यांचे कृषी सेवा केंद्र तसेच शेजारी रोहिदास चव्हाण रा. शेलगाव यांचे कपड्याचे दुकान, वैभव यादव रा. वांगी क्रमांक 2 यांचे जगदंबा मोबाईल व इलेक्ट्रॉनिक्स नावाने दुकान, औदुंबर शिंदे रा. कुंभेज यांचे कपड्याचे दुकान तर विलास गणपत नलवडे रा. बिटरगाव यांचे हार्डवेअरचे दुकान आहे. पाचही दुकानचे चालक रात्री साधारण आठच्या सुमारास घरी गेले होते. त्याचा फायदा घेत अनोळखी चोरट्यांनी दुकानातील मोबाईल, मशिन व इलेक्ट्रोनिक वस्तूंची चोरी केली आहे. यामध्ये मोटर पंप चार कॉपर केबल बंडल 60 हजार, लॅपटॉप 10 हजार, दोन लहान कॉपर केबल बंडल 10 हजार, तीन मोबाईल पंचवीस हजार आठशे असा एकूण एक लाख पाच हजार आठशे रुपयांचा मुद्देमाल चोरून नेला आहे.