नेवासा(अहमदनगर); पुढारी वृत्तसेवा : बीड तालुक्यातील पेंडगावजवळ चालकाचे नियत्रंण सुटून कारचा भीषण अपघात झाल्याची घटना आज २३ जून ला पहाटे घडली. या अपघातात नेवासा येथील तिघांचा जागीच मृत्यू झाला. तर एकजण गंभीर जखमी झालेआहे. नेवासा येथून मित्राच्या लग्नाला बीडकडे येत असताना पेंडगाव जवळ चालकाचे भरधाव कारवरील नियंत्रण सुटले. यामुळे काही कळायच्या आत तीन ते चार वेळा पलट्या घेत कार रस्त्याच्या बाजूला जाऊन उलटली.
अपघात ऐवढा भीषण होता की यात कारचा अक्षरशः चुराडा झाला आहे. घटनेची माहिती मिळताच महामार्ग व बीड ग्रामीण पोलीसांनी घटनास्थळी धाव घेतली. धीरज गुंदेचा (वय 30), रोहन वाल्हेकर (वय 32), विवेक कांगुणे (वय 33) अशी मृतांची नावे आहेत. तर आनंद वाघ (वय 28) हा गंभीर जखमी असून त्याच्यावर बीड जिल्हा रुग्णालयात उपचार सुरु आहेत. हे सर्व अहमदनगर जिल्ह्यातील नेवासा येथील रहिवासी आहेत.