पुणे ; वृत्तसंस्था : महिला ट्वेंटी-20 चॅलेंज (Women's T20 Challenge) लीगच्या सलामीच्या लढतीत हरमनप्रीत कौरच्या सुपरनोव्हा संघाने विजय मिळवला. 164 धावांच्या लक्ष्याचा पाठलाग करताना स्मृती मानधनाच्या ट्रेलब्लेझर संघाची अवस्था 7 बाद 73 अशी झाली होती. 63 धावांपर्यंत एकच विकेट गमावणार्या ट्रेलब्लेझर्सने पुढील 10 धावांत सहा विकेटस् गमावल्या. पूजा वस्त्राकरच्या उल्लेखनीय गोलंदाजीवर प्रिया पुनियाने दोन अफलातून झेल घेत सामनाच फिरवला. हरलीन देओलनेही भन्नाट कॅच घेतला. 4 विकेटस् घेणारी पूजा वस्त्राकर या विजयाची शिल्पकार ठरली.
पुण्याच्या एमसीए स्टेडियमवर झालेल्या सामन्यात ट्रेलब्लेझर संघाच्या आव्हानाचा पाठलाग करताना सुपरनोव्हाज संघाच्या प्रिया पुनिया आणि डिएंड्रा डॉटीन यांनी 4.5 षटकांत 50 धावा फलकावर चढवल्या. डॉटीनने 37 धावा केल्या. हिली मॅथ्यूजने प्रिया पुनियाचा (22) त्रिफळा उडवला.
हरलीन देओल व कर्णधार हरमनप्रीत कौर यांची 37 धावांची भागीदारी सलमा खातूनने संपुष्टात आणली. हरलीन 19 चेंडूंत 5 चौकारांसह 35 धावा करून बाद झाली. पूजा वस्त्राकर 14 धावा करून माघारी परतली. त्याच षटकात हरमनप्रीत धावचित झाली. तिने 29 चेंडूंत 4 चौकारांच्या मदतीने 37 धावा केल्या. सुपरनोव्हाचे 5 फलंदाज अवघ्या 9 चेंडूंत माघारी परतले. मॅथ्यूने 29 धावांत 3 विकेटस् घेतल्या. सुपरनोव्हाने सर्वबाद 163 धावा केल्या. (Women's T20 Challenge)
तत्पूर्वी, ट्रेलब्लेझर संघाची कर्णधार स्मृती मानधना व हिली मॅथ्यूज यांनी प्रत्युत्तरात 39 धावांची भागीदारी केली. पूजा वस्त्राकरने मात्र ट्रेलब्लेझरच्या तीन खेळाडूंना माघारी पाठवले. मॅथ्यूज (18), स्मृती (34) व सोफी डंक्ली (1) या तिघींना पूजाने बाद केले. त्यानंतर एलाना किंगने 9 व्या षटकात शर्मिन अख्तरेची (0) विकेट घेत सुपरनोव्हाचा विजय जवळपास पक्का केला. जेमिमा रॉ़ड्रीग्जवर आता ट्रेलब्लेझरच्या सर्व आशा होत्या. 11व्या षटकात रिचा घोष (2) कट मारण्याच्या प्रयत्नात डॉटीनच्या हाती झेल देऊन माघारी परतली.
अरुंधती रेड्डी विचित्र प्रकारे रनआऊट झाली. 1 बाद 63 वरून ट्रेलब्लेझरची अवस्था 7 बाद 73 अशी झाली. जेमिमाचा 24 धावांवर हर्लीन देओलने सुरेख झेल टिपला. पूजा वस्त्राकरने 4 षटकांत 12 धावांत 4 विकेटस् घेतल्या. सोफीने 19 धावांत 2 विकेटस् घेतल्या. पूनम यादव (7) ही किंगच्या (2-30) गोलंदाजीवर बाद झाली. ट्रेलब्लेझरना 9 बाद 114 धावाच करता आल्या आणि सुपरनोव्हाने 49 धावांनी विजय मिळवला.