Aiden Markram Catch Controversy South Africa New Zealand Semi Final: दक्षिण आफ्रिका आणि न्यूझीलंड यांच्यात झालेल्या सामन्यात एक वादग्रस्त झेल चर्चेचा विषय ठरला आहे. दक्षिण आफ्रिकेचा कर्णधार एडन मार्करम बाद झाल्यानंतर हा झेल खरोखर योग्य होता का, यावर सोशल मीडियावर चर्चा सुरू झाली आहे.
न्यूझीलंडच्या फिरकी गोलंदाजांनी सुरुवातीला दक्षिण आफ्रिकेच्या फलंदाजीवर चांगले नियंत्रण मिळवले. ऑफ-स्पिनर कोल मॅककोन्ची आणि डावखुरा फिरकीपटू रचिन रवींद्र यांनी प्रोटियाजच्या मजबूत फलंदाजीला मोठा धक्का दिला. मॅककॉन्चीने एका ओव्हरमध्येच दोन विकेट्स घेत क्विंटन डी कॉक आणि रायन रिकेल्टन यांना बाद केले. त्यामुळे दक्षिण आफ्रिकेची सुरुवातच वाईट झाली.
या सामन्यात एडन मार्करम 20 चेंडूत 18 धावांवर खेळत होता. रचिन रवींद्राच्या गोलंदाजीवर त्याने मोठा फटका मारण्याचा प्रयत्न केला. चेंडू डीपमध्ये गेला आणि डॅरिल मिशेलने झेल घेतला.
मात्र हा झेल योग्य होता का, याबाबत शंका निर्माण झाली आहे. स्वतः मिशेललाही सुरुवातीला खात्री नव्हती. तिसऱ्या पंचांनी मात्र हा झेल योग्य मानत मार्करमला बाद केले. यानंतर सोशल मीडियावर या निर्णयावरून वाद सुरू झाला आहे.
मार्करमच्या विकेटनंतर दक्षिण आफ्रिकेची स्थिती आणखी बिकट झाली. काही वेळातच संघाचा स्कोर 77 धावांवर 5 विकेट्स असा झाला. डेवाल्ड ब्रेविसने काही आकर्षक फटके खेळत 27 चेंडूत 34 धावा केल्या. मात्र जेम्स नीशमच्या गोलंदाजीवर तोही बाद झाला.
संघ अडचणीत असताना जॅन्सेन आणि स्टब्स यांनी डाव सावरला. दोघांनी सहाव्या विकेटसाठी 73 धावांची महत्त्वपूर्ण भागीदारी केली. जॅन्सेनने 30 चेंडूत नाबाद 54 धावांची तुफानी खेळी केली. त्याने पाच षटकार ठोकत संघाला सन्मानजनक धावसंख्येपर्यंत नेले.
डावाच्या शेवटी दक्षिण आफ्रिकेने 20 ओव्हर्समध्ये 8 विकेट्स गमावत 169 धावा केल्या. सुरुवातीला न्यूझीलंडच्या गोलंदाजांनी वर्चस्व गाजवले असले तरी शेवटच्या ओव्हर्समध्ये जॅन्सेनच्या आक्रमक फलंदाजीमुळे संघाला चांगला स्कोर उभा करता आला.
आता या सामन्यात न्यूझीलंडच्या फलंदाजीसमोर 170 धावांचे लक्ष्य होते. ते त्यांनी जबरदस्त खेळी करत गाठले. मात्र एडन मार्करम बाद झाला नसता तर दक्षिण आफ्रिकेने सामना जिंकला असता अशी चर्चा सोशल मीडियावर सुरु आहे. त्यामुळे हा सामना वादात सापडला आहे.