Vaibhav Suryavanshi
नवी दिल्ली: भारताचा युवा क्रिकेटपटू वैभव सूर्यवंशी याने ऑस्ट्रेलियात सुरू असलेल्या पहिल्याच टेस्ट सामन्यात झंझावाती खेळी करून सर्वांचे लक्ष वेधून घेतले. ब्रिस्बेन येथील इयान हीली ओव्हल मैदानावर सूर्यवंशीने केवळ ८६ चेंडूत ११३ धावा करत शतक ठोकले. या खेळीत त्याने तब्बल ८ षटकार ठोकले.
विशेष म्हणजे, यूथ टेस्ट कारकिर्दीतील वैभवचे हे दुसरे शतक ठरले असून, ऑस्ट्रेलिया अंडर-१९ संघाविरुद्धही त्याने दुसऱ्यांदा शतकी खेळी केली आहे. तसेच, ऑस्ट्रेलियन भूमीवरही त्याचे हे दुसरे शतक आहे.
१४ वर्षीय वैभवने पहिल्या डावात फक्त ३७ चेंडूत षटकार मारून अर्धशतक पूर्ण केले. अर्धशतक गाठल्यानंतरही त्याचा स्फोटक फॉर्म कायम राहिला, त्याने फक्त ७८ चेंडूत शतक पूर्ण केले. त्याने षटकार आणि नंतर चौकार मारून शतक पूर्ण केले. या हंगामात युवा कसोटीतील हे त्याचे पहिले शतक होते. यापूर्वी इंग्लंड दौऱ्यावर युवा कसोटी मालिकेदरम्यान तो शतक झळकावू शकला नव्हता, परंतु त्याने ऑस्ट्रेलियाविरुद्ध ही कामगिरी केली.
वैभवने पहिल्या डावात ११३ धावा केल्या, ८६ चेंडूत ८ षटकार आणि ९ चौकार मारले. भारताकडून वैभव सूर्यवंशी आणि कर्णधार आयुष महात्रे यांनी डावाची सुरुवात केली आणि त्यांनी पहिल्या डावात पहिल्या विकेटसाठी ४७ धावांची भागीदारी केली, परंतु त्यानंतर आयुष बाद झाला. त्याने १५ चेंडूत ४ चौकारांसह २१ धावा केल्या, तर तिसऱ्या क्रमांकावर फलंदाजीसाठी आलेला विहान मल्होत्रा फक्त ६ धावा करून बाद झाला.
तत्पूर्वी, या सामन्याच्या पहिल्या डावात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला आणि संपूर्ण संघ २४३ धावांवर ऑलआउट झाला. या संघाकडून स्टीव्हन होगनने सर्वाधिक ९२ धावा केल्या, तर भारताकडून दीपेश देवेंद्रनने सर्वाधिक ५ बळी घेतले, तर किशन कुमारने ३ बळी घेतले. खिलन पटेल आणि अनमोलजीत सिंगने प्रत्येकी एक बळी घेतला.