अहमदाबाद : अहमदाबादच्या नरेंद्र मोदी स्टेडियमवर आज क्रिकेटचा नवा 'महाभारत' रंगला. टी-२० विश्वचषकाच्या सुपर-८ फेरीत दक्षिण आफ्रिकेच्या 'प्रोटियाज' वीरांनी वेस्ट इंडिजच्या कॅरेबियन आव्हानाचा अक्षरशः धुराळा उडवला. प्रथम फलंदाजी करताना वेस्ट इंडिजने उभे केलेले १७७ धावांचे लक्ष्य दक्षिण आफ्रिकेने अवघ्या १६.१ षटकांत १ गड्याच्या मोबदल्यात गाठून ९ विकेट्स राखून महाविजय नोंदवला.
टॉस जिंकून द. आफ्रिकेने विंडीजला प्रथम फलंदाजीचे आमंत्रण दिले. लुंगी एनगिडी आणि कागिसो रबाडा यांनी सुरुवातीलाच आग ओकली. २९ धावांवर पहिली विकेट पडल्यानंतर विंडीजच्या फलंदाजीचा डोलारा पत्त्याच्या बंगल्यासारखा कोसळला. ७१ धावांत ६ गडी गमावल्यानंतर विंडीजचा संघ शंभरी गाठणार की नाही, अशी चिन्हे होती. मात्र, जेसन होल्डर (४९) आणि रोमॅरियो शेफर्ड (५२ नाबाद) यांनी खिंड लढवली. होल्डरच्या बॅटमधून निघालेल्या ठिणग्यांनी विंडीजला १७६ धावांच्या सन्मानजनक धावसंख्येपर्यंत पोहोचवले. आफ्रिकेकडून लुंगी एनगिडीने ३० धावांत ३ बळी घेत आपली धार सिद्ध केली.
१७७ धावांच्या लक्ष्याचा पाठलाग करायला उतरलेल्या आफ्रिकन सलामीवीरांनी 'आक्रमकता' हाच आपला मंत्र ठेवला. क्विंटन डिकॉकने पहिल्याच चेंडूपासून विंडीजच्या गोलंदाजांवर मानसिक दडपण निर्माण केले. त्याने केवळ २४ चेंडूंच्या आपल्या खेळीत १९५.८३ च्या स्ट्राईक रेटने ४७ धावा कुटल्या. डिकॉकने मारलेले ४ चौकार आणि ४ गगनभेदी षटकार हे विंडीजच्या खेळाडूंचे मनोधैर्य खच्ची करण्यासाठी पुरेसे होते. त्याच्या या झंझावातामुळे आफ्रिकेने पॉवरप्लेच्या ६ षटकांतच १ बाद ६९ धावांचा डोंगर उभा केला.
डिकॉक बाद झाल्यानंतर कर्णधार एडन मार्करामने मैदानाचा ताबा घेतला. सुरुवातीला संयम दाखवल्यानंतर त्याने आपल्या फटक्यांची धार वाढवली. मार्करामने विंडीजच्या फिरकी आणि वेगवान अशा दोन्ही गोलंदाजांना लक्ष्य केले. त्याने अवघ्या ४६ चेंडूत ८२ धावांची नाबाद खेळी साकारली. या खेळीत त्याने मैदानावर चौफेर फटकेबाजी करत ६ चौकार आणि ४ षटकार ठोकले. विशेषतः त्याने मारलेले कव्हर्स ड्राइव्ह आणि पूल शॉट्स पाहण्यासारखे होते. मार्करामने १६.१ व्या षटकात विजयी धाव घेत आफ्रिकेच्या विजयावर शिक्कामोर्तब केले.
या दरम्यान त्याला रायन रिकल्टनने भक्कम साथ दिली. रिकल्टनने आपल्या २८ चेंडूंच्या खेळीत नाबाद ४५ धावा केल्या. त्याने ४ चौकार आणि २ षटकार खेचत मार्करामला दुसऱ्या टोकाकडून पूर्ण स्वातंत्र्य दिले. या दोघांनी दुसऱ्या विकेटसाठी नाबाद ८२ धावांची भागीदारी रचली आणि विंडीजला सामन्यात डोके वर काढण्याची एकही संधी दिली नाही.
आफ्रिकेच्या फलंदाजीपुढे विंडीजचे गोलंदाज निष्प्रभ ठरले. एकाही कॅरेबियन गोलंदाजाला द. आफ्रिकेची ही विजयी नौका रोखता आली नाही.
अहमदाबादच्या खेळपट्टीवर दक्षिण आफ्रिकेने ज्या सहजतेने हा विजय मिळवला, त्यावरून त्यांनी आपल्या प्रतिस्पर्ध्यांना धोक्याचा इशाराच दिला आहे. वेस्ट इंडिजच्या ७१-६ अशा विदारक अवस्थेनंतर होल्डरने केलेले पुनरागमन विंडीजला आशा देऊन गेले होते, पण आफ्रिकेच्या फलंदाजीने त्या आशांचे 'रण' मैदान केले. या विजयासह दक्षिण आफ्रिकेने गुणतालिकेत आपले स्थान अधिक भक्कम केले असून, उपांत्य फेरीचे तिकीट पक्के केले आहे.