पुढारी ऑनलाईन डेस्क : आयपीएल 2025 च्या सातव्या सामन्यात टॉस गमावल्यानंतर सनरायझर्स हैदराबादने प्रथम फलंदाजी करताना 190 धावा केल्या आणि लखनौ सुपर जायंट्सला विजयासाठी 191 धावांचे लक्ष्य दिले. या सामन्यात हैदराबाद 300 पेक्षा जास्त धावा करेल की नाही याबद्दल काही चर्चा होती, परंतु हैदराबाद संघ 200 चा टप्पाही गाठू शकला नाही. हैदराबादकडून ट्रॅव्हिस हेडने सर्वाधिक 47 धावांची खेळी केली. तर अनिकेत वर्माने 36 आणि नितीश कुमार रेड्डी यांनी 32 धावा केल्या. लखनौकडून शार्दुल ठाकूरने 4 षटकांत 34 धावा देत 4 बळी घेतले.
लखनौ सुपर जायंट्सचा कर्णधार ऋषभ पंतने सनरायझर्स हैदराबादविरुद्ध टॉस जिंकून प्रथम गोलंदाजी करण्याचा निर्णय घेतला. लखनौ संघात एक बदल करण्यात आला, तर हैदराबाद संघात कोणताही बदल झाला नाही. लखनौकडून शार्दुल व्यतिरिक्त आवेश, दिग्वेश, बिश्नोई आणि प्रिन्स यादव यांनी प्रत्येकी एक विकेट घेतली.
घरच्या मैदानावर सामना खेळणारा हैदराबाद 300 पेक्षा जास्त धावा करू शकेल अशी चर्चा होती. तथापि, लखनौच्या घातक गोलंदाजांनी त्यांना 200 चा टप्पाही गाठू दिला नाही. फलंदाजीची सुरुवात करण्यासाठी आलेला अभिषेक शर्मा फक्त सहा धावा करून बाद झाला. यानंतर, गेल्या सामन्यात शतक झळकावणारा इशान किशन खातेही उघडू शकला नाही. डावाच्या तिसऱ्या षटकात शार्दुल ठाकूरने सलग दोन चेंडूंवर दोन्ही फलंदाजांना बाद केले.
यानंतर, ट्रॅव्हिस हेडला नितीश कुमार रेड्डीने चांगली साथ दिली. दोघांनीही तिसऱ्या विकेटसाठी 32 चेंडूत 61 धावांची भागीदारी केली. 28 चेंडूत 47 धावा काढल्यानंतर हेड पॅव्हेलियनमध्ये परतला. त्याला प्रिन्स यादवने बोल्ड केले. हेडला दोन जीवदानाचा फायदा घेता आला नाही.
लखनौविरुद्ध नितीश कुमार रेड्डी यांनी 32, हेनरिक क्लासेन यांनी 26, अनिकेत वर्मा यांनी 36, पॅट कमिन्स यांनी 18, अभिनव मनोहरने 2 धावा केल्या. तर मोहम्मद शमीने 1 धाव काढली. दरम्यान, हर्षल पटेल आणि सिमरजीत सिंग अनुक्रमे 12 आणि 3 धावा करून नाबाद राहिले.